Мастацтва з-за кратаў: выстава работ зняволеных у Рыме
Аляксандр Амяльчэня - Vatican News
У бенедыктынскім абацтве Сант-Анзэльма ў Рыме праходзіць выстава "Fra qua e là. Immagini dalla prigionia" ("Паміж тут і там. Вобразы з зняволення"), якая прадстаўляе мастацкія работы зняволеных з розных краін свету. Падзея стала часткай серыі выстаў, запланаваных на працягу Святога года.
Даць голас людзям за кратамі
Дыякан Хайнц-Петэр Эхтэрмеер, адзін з ініцыятараў выставы і старшыня асацыяцыі "Art in Prison", падкрэслівае важнасць гэтай ініцыятывы: "Мы хочам даць голас людзям за кратамі, і ён выразна гучыць у розных карцінах: у колерах, матывах і зместах, якія там можна ўбачыць. Мастацтва – гэта магчымасць знайсці формы самавыяўлення, якія нагадваюць, што чалавека нельга зводзіць да злачынства."
Сярод прадстаўленых работ – карціны, якія адлюстроўваюць жаданне свабоды, надзею і ўспаміны пра сямейнае жыццё. Некаторыя з іх былі створаны ў надзвычай складаных умовах зняволення.
Падтрымка Папы Францішка
Папа Францішак выказаў сваю падтрымку выставе, напісаўшы ліст да яе адкрыцця. У ім ён ацаніў працу асацыяцыі "Art in Prison" і заахвоціў працягваць гэтую важную ініцыятыву.
Эхтэрмеер падзяліўся цікавым фактам пра сваю выпадковую сустрэчу з тагачасным кардыналам Берголіа шмат гадоў таму. "І, магчыма, гэта было пачаткам таго, што мы можам перажыць сёння ў Святы 2025 год", - лічыць дыякан.
Выстава ў абацтве Сант-Анзэльма на Авенціне будзе адкрыта да 16 мая 2025 года, з панядзелка па пятніцу з 10.00 да 12.00 і з 15.00 да 18.00.
