ВАТЫКАН

Ватыканскі іерарх: стымуляваць да вывучэння Бібліі

Мы павінны зноў пачаць стымуляваць да вывучэння Святога Пісання, а таксама да разумення таго, што яно асвячае жыццёвы шлях верніка, - падкрэсліў старшыня Папскай рады па культуры.

Любоў да Бібліі была лейтматывам жыцця св. Гераніма, - заўважыў кардынал Джанфранка Равазі ў каментары да Апостальскага ліста Scripturae Sacrae Affectus, які пабачыў свет 30 верасня 2020 г. Францішак прысвяціў дакумент 1600-годдзю з дня смерці вялікага перакладчыка Святога Пісання на лацінскую мову.

Ватыканскі іерарх нагадаў, што стымулам для перакладчыцкай працы св. Гераніма стала аб’яўленне Хрыста ў яго жыцці. З таго моманту аматар літаратурнай спадчыны Цыцэрона пачаў глыбока вывучаць старажытнаяўрэйскую мову і культуру, каб максімальна дакладным чынам данесці да сваіх сучаснікаў слова Бібліі.

Паводле кардынала Равазі, гэта прыклад для сучасных навукоўцаў, якія імкнуцца глыбей пазнаць Божае слова праз мовазнаўства, гісторыю, археалогію, дапамагчы таму, каб напоўніцу аб’явілася багацце яго духоўнага зерня, яго промняў святла.

Старшыня Папскай рады звярнуў увагу на тое, што ў свеце пастаянна зніжаецца цікавасць да кніг і застаецца высокім узровень непісьменнасці. У сувязі з гэтым, ён адзначыў важнасць закліку Пантыфіка да адкрыцця ўласных каранёў, скіраваны да моладзі.

“Хрысціянства робіць вас спадкаемцамі неперасягненай культурнай спадчыны, якой вы павінны валодаць. Будзьце ў захапленні ад гэтай вашай гісторыі”, - нагадаў кардынал Равазі словы Папы з Апостальскага ліста Scripturae Sacrae Affectus.