Ватыканскі прэфект: у добрага журналіста ёсць чысты позірк
Ян Глінскі - Vatican News
На думку Паола Руфіні, словы “ідзі і паглядзі” – адзіны спосаб зразумець рэчаіснасць і расказаць праўду.
“Толькі чысты позірк можа заўважыць, распазнаць, зразумець і вярнуць да адзінства фрагментаваную складанасць рэчаіснасці, а таму і пазнаць яе”, - падкрэсліў кіраўнік ватыканскага ведамства.
У 55-ы Дзень сродкаў масавай камунікацыі Руфіні нагадаў, што добры журналіст павінен захоўваць “чысты позірк”, а таксама выказаў думку, што журналістыка больш падыходзіць асобам з цвёрдым сэрцам. Чэрпаючы з малітвы Папы на заканчэнне сёлетняга паслання пад назвай “Ідзі і паглядзі”, эксперт звярнуў увагу, што менавіта гэтыя два словы з’яўляюцца “самым простым спосабам пазнання рэчаіснасці”.
Прэфект засяродзіўся таксама на ключавых паняццях для свету камунікацыі. Першае з іх – “выйсце”. Выхад насустрач іншым, а найперш у кірунку “найбольш аддаленых, забытых, патрабуючых разумення, суцяшэння і дапамогі”. Другое – “хаджэнне”, што з’яўляецца натуральным станам камунікуючага, які ніколі не павінен затрымлівацца.
Трэцяе ключавое паняцце – пошук “праўды” – з’яўляецца сапраўдным падарожжам: але гаворка ідзе аб праўдзе, расказанай належнымі, а не канфармісцкімі, лянівымі і паглынутымі часам словамі.
“Эра фэйкавых навін” на самой справе “стварае монстраў, якія карыстаюцца блізарукасцю” нашай: палітык крадзе, значыць усе палітыкі злодзеі, хтосьці меў праблемы са здароўем пасля вакцынацыі, значыць вакцына дрэнная.
І апошнім фундаментальным паняццем у сферы слушнай камунікацыі, як адзначыў Руфіні, з’яўляецца “справядлівасць” – слова, якое заклікае “заглянуць у глыбіню сябе” і “ставіць нас перад абліччам адказнасці”. Таму ўзнікае разыходжанне паміж “канцэнтраваннем на саміх сабе як журналістах, якія камунікуюць і апавядаюць пра свае мроі”, і здольнасцю “пайсці, убачыць, дакрануцца і расказаць праўду пра ўбачанае”, нават рызыкуючы не зразумець, што будзем падманутымі ці памылімся. У такім выпадку трэба выправіцца і аднавіць вандроўку, - лічыць прэфект Дыкастэрыі па камунікацыі.
Сусветны дзень масавай камунікацыі быў устаноўлены ў Касцёле ў 1967 г. Сёлета яго адзначалі 16 мая ў 55-ы раз.
