Кардынал Кох здзейсніў экуменічны візіт у Ірак

Аляксандр Панчанка – Vatican News

Старшыня Папскай рады спрыяння хрысціянскаму адзінству зачытаў спецыяльнае пасланне Святога Айца, які пажадаў “шматлікіх духоўных дароў” новаму Патрыярху, “каб быў сапраўдным пастырам свайго народа і нястомным будаўніком міра і братэрства, служачы агульнаму дабру”.

Пантыфік запэўніў Марка Аву ІІІ у малітве з пажаданнем, каб “адносіны паміж Каталіцкім Касцёлам і Асірыйскай Царквой Усходу ўсё больш і больш умацоўваліся не толькі ў духу братэрскага супрацоўніцтва, але таксама праз паглыбленне тэалагічнага дыялогу”, які “дазволіць узрастаць у адзінстве і сведчыць перад светам аб збаўчай праўдзе Евангелля”.

Кардынал Кох нагадаў пра блізкасць Святога Айца да іракскага народа і запэўніў у гатоўнасці Папскай рады па спрыянні хрысціянскаму адзінству “як мага хутчэй зрабіць наступныя крокі – як у тэалагічнай, так і душпастырскай сферы – на шляху да поўнай еднасці, якая не з’яўляецца ні паглынаннем, ні зліццём, але адзінствам у праўдзе і любові”. Іерарх перадаў прадстаяцелю Асірыйскай Царквы Усходу спецыяльны падарунак ад Папы – літургічны келіх, з надзеяй, што аднойчы яны змогуць разам цэлебраваць літургію “пры ахвярным алтары ў паўнаце эўхарыстычнай еднасці”.

У рамках візіту ў Ірак кардынал Кох узначаліў св. Імшу ў каталіцкім касцёле ў Масуле, наведаў старажытны сіра-праваслаўны манастыр Мар-Матай, каталіцкі шпіталь Мар’ямана і ўніверсітэт у Эрбіле.