ВАТЫКАН

Тарніелі пра “стрэс-тэст” ватыканскай судовай сістэмы

Андрэа Тарніелі пракаментаваў судовы працэс адносна фінансавых злоўжыванняў, звязаных з набыццём элітнай нерухомасці ў Лондане, што праходзіць у Трыбунале Дзяржавы Ватыкан.

Аляксандр Панчанка – Vatican News

У апошнія дзесяцігоддзі ватыканскае правасуддзе яшчэ ніколі не сутыкалася з такім складаным працэсам. Гэта бачна па колькасці асоб, у адносінах да якіх праводзілася расследаванне, і якія потым сталі падазраванымі, па колькасці паказанняў і выкарыстанні камп’ютэрных матэрыялаў, і, нарэшце, па колькасці і цяжкасці меркаваных злачынстваў, - адзначыў галоўны рэдактар СМІ Апостальскай Сталіцы ў сваёй аўтарскай калонцы на партале Vatican News.

Тарніелі нагадаў, што справа пачалася з унутранага расследавання, санкцыянаванага Францішкам амаль тры гады таму, і падкрэсліў, што працэс з’яўляецца сапраўдным “стрэс-тэстам” для ўсёй ватыканскай судовай сістэмы.

Ад самага пачатку судовага працэсу яго ўдзельнікі сутыкнуліся з некаторымі праблемамі, напрыклад, звязанымі з выкарыстаннем працэсуальнага кодэксу 1913 года, які адрозніваецца ад таго, што дзейнічае ў цяперашні час у Італіі. Гэта стварыла складанасці для ўсіх бакоў, якія ўжывалі сучасныя сродкі да сітуацый, якія заканадаўца стогадовай даўніны не мог прадбачыць: напрыклад праслухоўванне тэлефонных размоў ці выняцце і выкарыстанне камп’ютэрнай тэхнікі. Іншая цяжкасць: велізарны аб’ём дакументаў і судовых патрабаванняў, неабходных для раскрыцця грашовых патокаў, якія складаюць структуру абвінавачвання.

Падчас судовых пасяджэнняў, якія прайшлі да цяперашняга часу, Трыбунал Дзяржавы Ватыкан выразна прадэманстраваў жаданне гарантаваць права на абарону і на справядлівы працэс. Менавіта дзеля гэтай мэты суд вярнуў дзяржаўнаму абвінаваўцы дакументы да дапрацоўку. Таксама Трыбунал абавязаў яго прадставіць усе дакументы, якія знаходзяцца ў яго распараджэнні, такія як аўдыё- і відэазапісы допытаў падсудных і сведкаў, праведзеныя з дапамогай інструментаў, якія, натуральна, не маглі быць прадугледжаны заканадаўствам 1913 года.

Тарніелі патлумачыў, што цяпер чакаецца, пакуль бок абвінавачвання вызначыць сваю пазіцыю ў адносінах да некалькіх падсудных, або зняўшы з іх абвінавачванні, або прадставіўшы новае заключэнне абвінавачвання. Гэта частка працэдуры будзе завершана да сярэдзіны студзеня 2022 г. Толькі затым будзе магчыма перайсці да этапу працэса, на якім будзе вывучацца велізарная колькасць файлаў і дакументаў, якія складаюць абвінаваўчае заключэнне, - патлумачыў Андрэа Тарніелі.

Судовы працэс, звязаны з фінансавымі злоўжываннямі, які праходзіць у Ватыкане, з’яўляецца беспрэцэдэнтным: на лаўцы падсудных спачатку апынуліся 10 абвінавачаных, сярод якіх высокапастаўлены кардынал. Пасля першых пасяджэнняў Трыбунала іх засталося шэсць. Расследаванне дзейнасці іншых чатырох чалавек яшчэ працягваецца.