Папскі фонд ухваліў першы пакет дапамогі Украіне
Аляксандр Панчанка – Vatican News
У першую чаргу дапамога прызначана для ўсходняй часткі Украіны, у прыватнасці, для чатырох экзархатаў Украінскай грэка-каталіцкай Царквы і дзвюх дыяцэзій лацінскага абраду: гаворка ідзе пра Харкаўскі, Адэскі, Данецкі і Крымскі экзархаты і Харкаўска-Запарожскую і Адэска-Сімферопальскую дыяцэзіі. Тут будуць ажыццяўляцца 9 праектаў на агульную суму ў 865 тысяч еўра. Астатнія рэсурсы адрасаваны заходнім рэгіёнам Украіны, у першую чаргу Луцкай дыяцэзіі, праз тэрыторыю якой праходзяць патокі эвакуіраваных, што накіроўваюцца ў Польшчу.
Сродкі будуць размеркаваны кожным біскупам у адпаведнасці з канкрэтнымі патрэбамі святароў, кансэкраваных асобаў і свецкіх вернікаў, многія з якіх клапоцяцца пра дзіцячыя дамы, дамы для састарэлых і цэнтры для самотных маці. У бліжэйшыя дні Папскі фонд намераны ўхваліць яшчэ адзін пакет дапамогі, які ахопіць 17 епархій Украінскай грэка-каталіцкай Царквы і 7 дыяцэзій Каталіцкага Касцёла лацінскага абраду.
Разам з гэтымі ініцыятывамі Папскі фонд “Дапамога Касцёлу ў патрэбе” працягвае аказваць падтрымку святарам і кансэкраваным асобам, а таксама фінансаваць праекты неадкладнай дапамогі ва ўмовах пандэміі COVID-19. Фонд будзе працягваць збор ахвяраванняў, каб падтрымаць дабрачынную дзейнасць Касцёла ва Украіне на карысць насельніцтва, якое церпіць ад вайны.
