Кардынал пра перспектывы візіту Пантыфіка ў Кіеў

Паводле кардынала Майкла Чэрны, магчымы папскі візіт у Кіеў спачатку запатрабуе выканання ўмоў, неабходных для прыняцця канкрэтных крокаў да міру.

Аляксандр Амяльчэня - Vatican News

“Толькі ў такім выпадку ініцыятыва можа мець вялікі рэзананс. Гэта тычыцца не толькі палітычнай і ваеннай сітуацыі, але і экуменічнага дыялогу”, - заявіў выконваючы абавязкі прэфекта Дыкастэрыі па служэнні інтэгральнаму развіццю чалавека італьянскаму выданню Il Giornale.

Выявы з кіеўскага прыгарада Буча, дзе расійскія салдаты забівалі мірных жыхароў, напоўнілі іерарха “жахам, трывогай і глыбокім смуткам ад таго, наколькі глыбокім можа быць чалавечае вераломства”.

Кардынал не даў канкрэтнага адказу на пытанне, ці быў гэта генацыд. “Гэта пытанне міжнародных правоў чалавека, якое таксама належыць да далейшага суду гісторыі”, - падкрэсліў ён. Паводле іерарха, "важнейшым за канкрэтныя вызначэнні з’яўляецца тое, што кожны робіць у сваёй вобласці, каб пакласці канец насіллю".

Спецыяльны пасланнік Папы падзяліўся эмоцыямі ад свайго візіту на венгерска-ўкраінскую і славацка-ўкраінскую мяжу. Ён быў уражаны людзьмі, якія клапоцяцца пра бежанцаў. "Яны з'яўляюцца сапраўднай арміяй міру, мабілізаванай для ініцыятыў гасціннасці і салідарнасці", - сказаў кардынал Чэрны.