Кардынал Краеўскі адправіўся ва Украіну з новай місіяй
Аляксандр Панчанка – Vatican News
Папскі элемазінарый здзейсніць падарожжа за рулём машыны хуткай дапамогі, якую перадасць уладам Кіева ў якасці падарунка Францішка. Некалькі тыдняў таму ён даставіў яшчэ адзін такі аўтамабіль у Львоў.
“Перадаючы гэты ратавальны транспартны сродак, папа Францішак прагне схіліцца над людзьмі Украіны, параненымі вайной, і засведчыць ім сваю блізкасць. Калі нехта паранены, хворы ці немачны будзе перавозіцца машынай хуткай дапамогі, ён зможа адчуць абдымкі і суцяшэнне Папы, які хоча пяшчотна крануць і пацалаваць ногі братоў і сясцёр, што пакутуюць ад несправядлівага гвалту вайны”, - гаворыцца ў паведамленні Апостальскай элемазінарыі.
Кардынал Краеўскі распавёў Vatican News, што машына хуткай дапамогі, якую ён даставіць у Кіеў, была атрымана непасрэдна з заводу ў Фларэнцыі. Яна мае вельмі добрую камплектацыю. Частка медыцынскага абсталявання аўтамабіля была ахвяравана ватыканскай педыятрычнай бальніцай Bambino Gesù. У прыватнасці, ён аснашчаны сучаснымі дэфібрылятарамі для дзяцей.
Плануецца, што аўтамабіль будзе перададзены аднаму з кіеўскіх шпіталёў у Вялікі чацвер – у дзень, калі падчас літургіі здзяйсняецца жэст абмывання ног, што нагадвае пра бязмежную любоў Бога да чалавека і пра пакліканне людзей служыць адзін аднаму.
Чарговы візіт Апостальскага элемазінарыя ва Украіну адбудзецца ў кантэксце Вялікага тыдня, на працягу якога Касцёл перажывае муку і смерць Хрыста, і які завяршаецца Яго ўваскрасеннем. Менавіта ў гэты асаблівы для хрысціян перыяд Святы Айцец хацеў выказаць сваю асаблівую блізкасць украінскаму народу, - падзяліўся іерарх. Ён распавёў, што правядзе Пасхальны трыдуум з Апостальскім нунцыем ва Украіне. Плануецца іх удзел у цэлебрацыях у розных храмах, каб падтрымаць украінскіх вернікаў у надзеі на тое, што пасля пакут заўсёды надыходзіць радасны світанак уваскрасення.
