Каля трох тысяч допісаў з пажаданнямі да 95-годдзя Бэнэдыкта XVI
Аляксандр Амяльчэня - Vatican News
Паводле інфармацыі нямецкай газеты Tagespost, на сайце benedictusXVI.org размешчаны 2893 віншавальныя допісы на 24 мовах.
“З нагоды майго 95-га юбілею я атрымаў шмат сардэчных пажаданняў з усяго свету. Такая колькасць знакаў вернасці і лучнасці прынесла мне шмат задавальнення. З пачуццём удзячнасці я адчуваю сувязь з усімі ў малітве”, - такі каментар Бэнэдыкта XVI змешчаны на сайце.
Больш за ўсё пажаданняў, акрамя нямецкай, было даслана на англійскай, італьянскай і польскай мовах. Інфармацыю газеце перадаў, пасля кансультацыі з юбілярам, яго асабісты сакратар, арцыбіскуп Георг Генсвайн. “Бэнэдыкт XVI даручыў мне выказаць шчырую падзяку ўсім, хто перадаў яму свае віншаванні з Днём нараджэння праз сайт benedictusXVI.org. З вялікай радасцю і глыбокім хваляваннем ён прачытаў шмат шчырых слоў, якія даслалі яму такім чынам”, - адзначыў іерарх.
