Дзяржсакратар: шмат бязвінных людзей згубілі ўсё ва Украіне
Аляксандр Панчанка – Vatican News
Дзяржсакратар Яго Святасці Папы прыняў удзел у цырымоніі, падчас якой ад імя Апостальскай Сталіцы атрымаў прэмію “за настойлівае служэнне на карысць згоды і міру паміж народамі”, устаноўленай італьянскай грамадскай арганізацыяй Istituto Nazionale Azzurro, якая дзейнічае ў гуманітарнай сферы, спрыяючы міжкультурнаму, міжнацыянальнаму і міжрэлігійнаму дыялогу.
Бліжэйшы супрацоўнік Пантыфіка назваў узнагароду стымулам для таго, каб заставацца “настойлівымі ў дыпламатычнай дзейнасці”, якая, хоць і натхнёная касцёльнай місіяй, заўсёды “накіравана на забеспячэнне ўпарадкаванага суіснавання ў свеце”.
Кардынал Паралін нагадаў пра адчуванне вялікай адказнасці, якое на працягу доўгай традыцыі адрознівае дзейнасць Апостальскай Сталіцы ў міжнароднай сферы. Ён выказаў перакананасць у тым, што дыпламатыя, нягледзячы на ўсе свае абмежаванні, таксама і сёння будзе заставацца інструментам, які зможа даць шлях “законным памкненнямі кожнага народа да бяспекі, стабільнасці і міру”.
Дзяржсакратар зазначыў, што гэтыя намаганні сёння запатрабаваны асаблівым чынам у кантэксце сітуацыі ва Украіне, дзе шмат бакоў прыкладаюць намаганні дзеля таго, каб завяршылася вайна, ад наступстваў якой “вельмі шмат бязвінных людзей згубілі ўсё: блізкіх, сем’і, жыллё, грамадзянскае суіснаванне і само жыццё”.
