Святы Пасад: новыя аспекты падрыхтоўкі да сакрамэнту сужэнства
Ян Глінскі - Vatican News
Выданне ў 97 старонак з’яўляецца дапаможнікам для біскупаў, святароў, сужэнстваў і асоб, якія займаюцца душпастырствам сем’яў.
Прадмову да кнігі пад назвай Катэхуменальныя даведнікі для сужэнскага жыцця – душпастырскае кіраўніцтва для лакальных Касцёлаў напісаў Францішак. Пантыфік назваў адпаведную падрыхтоўку да сакрамэнту сужэнства ў Каталіцкім Касцёле пытаннем справядлівасці. Ён указаў на абавязак адказных асоб спадарожнічаць нарачоным, каб ім не пагражала траўма разлукі і яны ніколі не страцілі веры ў любоў.
Як адзначыў Святы Айцец, дакумент утрымлівае падказкі, якія павінны быць дастасаваны да канкрэтных культур і сітуацый, а не лічыліся “магічнымі формуламі”.
“Для Маці Касцёла з’яўляецца абавязкам справядлівасці прысвячэнне часу і энергіі на падрыхтоўку тых, каго Пан кліча да такой вялікай місіі як сям’я”, – адзначыў Францішак, нагадваючы, што ў адрозненні ад нарачоных будучыя святары і кансэкраваныя асобы атрымліваюць шматгадовую падрыхтоўку.
З прычыны павярхоўнай падрыхтоўкі да сужэнства, як адзначыў Папа, пары рызыкуюць заключыць несапраўднае сужэнства або, маючы слабыя фундаменты, могуць не перажыць непазбежныя крызісы.
Святы Айцец выказаў надзею, што ў хуткім часе з’явіцца чарговы дакумент, прысвечаны людзям, сужэнствы якіх распаліся, і яны жывуць у новым саюзе або ў грамадзянскім шлюбе. Касцёл хоча спадарожнічаць гэтым парам, “каб яны не адчувалі сябе пакінутымі”.
Дакумент мае тры раздзелы: падрыхтоўка да сужэнства, урачыстасць шлюбу, суправаджэнне падчас першых гадоў сужэнства. Як сцвярджаецца ў паведамленні Дыкастэрыі, у тэксце закранаюцца два новыя аспекты: “Перш за ўсё позірк скіраваны на будучыню сям’і, з вельмі далёкай падтрыхтоўкай да сужэнскага паклікання. Гаворка ідзе аб падрыхтоўцы грунту праз распачацце працы з дзецьмі, падлеткамі і моладдзю, а таксама стварэнне душпастырства паклікання, якое (…) суправаджала б іх у паступовым адкрыванні паклікання да хрысціянскага сямейнага жыцця”.
На сёння кніга выдадзена толькі на італьянскай. У хуткім часе з’явяцца версіі на іншых мовах.
