Святы Пасад у ААН: атамныя рэактары не павінны быць мішэнню падчас вайны
Аляксандр Панчанка - Vatican News
Мансеньёр Габрыэле Кача ўзял слова падчас канферэнцыі па пераглядзе Дамовы аб нераспаўсюджванні ядзернай зброі, якая 1-26 жніўня 2022 года праходзіць у Нью-Ёрку. Кіраўнік ватыканскай дэлегацыі падкрэсліў, што атамная энергетыка павінна выкарыстоўвацца выключна для мірных мэт.
Жэнеўская канвенцыя забараняе напады на атамныя электрастанцыі і заклікае адносіць абарону грамадзянскіх аб’ектаў да прыярытэтаў міжнароднай павесткі дня, у тым ліку абарону аб’ектаў атамнай інфраструктуры, - нагадаў папскі дыпламат. Ён зазначыў, што ў свеце дзейнічае 440 ядзерных рэактараў, што складае пятую частку глабальнай энергетыкі з нізкіх узроўнем выкідаў вугляроду і мае вырашальнае значэнне для барацьбы са зменамі клімату.
“У той час як наш супольны дом адчувае ўплыў экалагічнага крызісу, барацьба з дэфіцытам ежы і вады з’яўляецца фундаментальнай, асабліва для самых бедных і ўразлівых у свеце. Ядзерная тэхналогія паспрыяла таксама ўстойліваму развіццю праз дапамогу ў барацьбе з ракам, паляпшэнне ўраджайнасці, абарону водных запасаў і маніторынг забруджвання акіяна”, - сказаў мансеньёр Кача.
Апостальская Сталіца, пацвярджаючы сваю залучанасць у дзейнасць МАГАТЭ, заклікае да цэласнага, а не тэхнакратычнага ці эксклюзіўнага падыходу да выкарыстання ядзерных тэхналогій, які бярэ пад увагу тое, што ў свеце ўсё ўзаемазвязана: ад плачу зямлі да плачу бедных. “Зямля, наш дом, пачынае станавіцца ўсё больш падобнай да вялізарнай гары смецця. Кожны год утвараюцца сотні мільёнаў тон адкідаў, большая частка якіх не падлягае біялагічнаму раскладанню, з’яўляецца высокатаксічнай і радыёактыўнай. Часта не прымаюцца меры, пакуль здароўю людзей не будзе нанесена непапраўная шкода”, - папярэдзіў мансеньёр Кача.
Прадстаўнік Святога Пасаду прызнаў, што новыя дасягненні ў галіне ядзернай энергетыкі дазваляюць спадзявацца на магчымасць атрымання энергіі, якая не будзе аказваць негатыўнага ўплыву ні на клімат, ні на здароўе людзей. Ён нагадаў таксама, што “перад дзяржавамі стаіць задача адраджэння асяроддзя, пацярпелага ад ядзерных аварый і здабычы ўрану, падтрымкі пацярпелага насельніцтва і ўзгаднення доўгатэрміновых рашэнняў у сферы захоўвання радыёактыўных адкідаў”.
Апостальская Сталіца “вітае адкрыццё ў Казахстане банка МАГАТЭ для нізкаўзбагачанага ўрану і заклікае прыкласці больш намаганняў для шматбаковай арганізацыі ядзернага паліўнага цыклу”, каб спрыяць, згодна з жаданнем Папы, “сусветнаму парадку на падставе адзінства чалавечай сям’і, заснаванага на павазе, супрацоўніцтве, салідарнасці і спагадзе”, каб супрацьпаставіць “логіцы страху этыку адказнасці”.
