Сінод Біскупаў пра 60-годдзе Другога Ватыканскага Сабора
Марыя Валодзіна – Vatican News
60-я гадавіна адкрыцця Другога Ватыканскага Сабора - момант асаблівай радасці для Сінода Біскупаў, які з'яўляецца плёнам гэтага экуменічнага сходу, часткай яго “самай каштоўнай спадчыны”, - гаворыцца ў пасланні.
Сінод Біскупаў быў заснаваны святым Паўлам VI напачатку чацвёртага і апошняга перыяду Сабора (15 верасня 1965 года) у адказ на шматлікія просьбы айцоў Сабора.
Мэтай Сінода было і застаецца пашырэнне духу Другога Ватыканскага Сабора, распаўсюджанне яго вучэння сярод Народа Божага, пашырэнне ўсведамлення таго, што гэты Сабор стаў “вялікай міласцю, ад якой выйграў Касцёл у XX стагоддзі” (Ян Павел II, Апостальскі ліст Novo Millennio ineunte, 6 студзеня 2001 г., 57).
Цягам дзесяцігоддзяў Сінод Біскупаў знаходзіўся на службе Другога Ватыканскага Сабора, спрыяў абнаўленню твара Касцёла, застаючыся глыбока верным Святому Пісанню і Традыцыі і ўважліва прыслухоўваючыся да знакаў часу.
Сінадальны працэс, які адбываецца ў наш час пад дэвізам Сінадальнасць ў жыцці і місіі Касцёла, таксама ёсць вынікам Другога Ватыканскага Сабора. Паняцце “сінадальнасці” ўласціва Сабору, нягледзячы на тое, што гэты тэрмін быў уведзены толькі нядаўна і не сустракаецца ў яго дакументах.
Тры ключавыя словы “камунія, удзел і місія”, якія Святы Айцец уключыў у назву сінадальнага працэса, вельмі саборныя словы. Касцёл, які мы закліканы будаваць, уяўляе сабою супольнасць жанчын і мужчын, аб'яднаных адной верай, Хростам і Эўхарыстыяй.
Яшчэ да таго, як Касцёл пайшоў па шляху сінадальнага падарожжа, Бэнэдыкт XVI сцвярджаў, што “сінадальнае вымярэнне з'яўляецца канстытуцыйным для Касцёла”. Папа Францішак назваў сінадальнасць “шляхам, які Бог чакае ад Касцёла трэцяга тысячагоддзя”, - гаворыцца ў пасланні Генеральнага сакратарыята Сінода Біскупаў.
