Новы рэктар будучых ватыканскіх дыпламатаў
Святы Айцец прызначыў старшынёй Папскай Касцёльнай Акадэміі арцыбіскупа Сальваторэ Пенак’ё. Яго папярэднік, арцыбіскуп Джозэф Марына, некалькі дзён таму сышоў на пенсію.
Аляксандр Амяльчэня – Vatican News
Папская Касцёльная Акадэмія ажыццяўляе падрыхтоўку святароў для працы ў дыпламатычным корпусе і Дзяржаўным сакратарыяце Апостальскай Сталіцы. Тэрмін навучання – два гады. Акрамя таго, з 2020-2021 навучальнага года студэнты праходзяць гадавую стажыроўку ў дыяцэзіях свету. Аўтарам новаўвядзення стаў Францішак.
70-гадовы італьянскі арцыбіскуп Пенак’ё раней узначальваў дыпламатычныя місіі Святога Пасада ў Руандзе, Тайландзе, Сінгапуры, Камбоджы, Брунеі, Лаосе, Малайзіі, М'янме, Індыі і Непале. З жніўня 2016 года быў апостальскім нунцыем у Польшчы.
25 студзеня 2023, 12:08
