Святы Пасад заклікае кансэкраваных асоб да місіянерства
Аляксандр Панчанка - Vatican News
“Місіянерства вядзе нас да паўнаты нашага хрысціянскага паклікання, дае нам магчымасць вярнуцца да стыля Бога, якім з’яўляецца блізкасць, спагада і пяшчота, што выяўляецца ў словах, прысутнасці і повязях сяброўства”, - гаворыцца ў дакуменце.
Святы Пасад заклікае кансэкраваных асоб не адасабляцца ад жыцця людзей і клапаціцца пра ўразлівых і бедных нашага часу, лечачы раны і аздараўляючы разбітыя сэрцы Божым алеем. Нагадваецца, што “місія – гэта кісларод хрысціянскага жыцця”, а аб місіянерскім запале неабходна настойліва прасіць у малітве да Святога Духа.
Пасланне было абнародавана за подпісам кардынала Жуана Браз дэ Авіса і арцыбіскупа Хасэ Радрыгеса Карбальё, адпаведна прэфекта і сакратара Дыкастэрыі па справах інстытутаў кансэкраванага жыцця і таварыстваў апостальскага жыцця.
Паведамляецца, што 2 лютага кардынал дэ Авіс будзе цэлебраваць святую Імшу з нагоды Сусветнага дня кансэкраванага жыцця. Яна пройдзе ў рымскай базыліцы Санта-Марыя-Маджорэ. Звычайна гэту літургію ўзначальвае Папа, але сёлета ў гэты дзень ён будзе знаходзіцца ў Апостальскім падарожжы ў Дэмакратычнай Рэспубліцы Конга і Паўднёвым Судане.
