Новая кніга пра Ратцынгера: Папа, які сышоў з трона

Марыя Валодзіна - Vatican News

28 лютага 2023 года адзначаецца дзясятая гадавіна апошняй публічнай прамовы Бэнэдыкта XVI у якасці главы Каталіцкага Касцёла. Ён развітаўся з светам як “просты пілігрым, які пачынае апошні этап сваёй пілігрымкі на гэтай зямлі”. У той дзень у Кастэль Гандольфа ўступіла ў сілу адрачэнне ад пантыфікату, аб якім Бэнэдыкт XVI абвясціў 11 лютага 2013 года. Сыходзячы з пасады дзесяць гадоў таму, Ратцынгер казаў, што ў яго абранні Папам было нешта, што застанецца "назаўжды". Ён да апошніх дзён апранаўся ў белае, падпісваўся як Папа-эмерыт Бэнэдыкт XVI і працягваў жыць у Ватыкане.

Ватыканіст Джакама Галеацы прысвяціў сваю кнігу асабістай гісторыі Ёзэфа Ратцынгера, выкарыстоўваючы гістарычныя і журналісцкія крыніцы, сведчанні, успаміны, гісторыі і невялікія анекдоты, напрыклад, пра тое, як былы прэзідэнт Італіі Франчэска Касіга, якога з Бэнэдыктам XVI звязвала любоў да літаратуры, дасылаў яму ў Ватыкан па нядзелях традыцыйныя прысмакі.

Галеацы прасачыў асноўныя этапы жыцця Бенедыкта XVI: ад вучобы да Другога Ватыканскага Сабора, ад пантыфікату да сыходу ў адстаўку. Кніга змяшчае аповед пра яго маладосць, інтэлектуальны супраціў нацызму, акадэмічныя даследаванні, пераезд у Рыме, цесны кантакт з найвялікшымі біскупамі і тэолагамі XX стагоддзя падчас Другога Ватыканскага Сабора, канклаў 2005 года, які абраў кардынала Ратцынгера 264-м пераемнікам святога Пятра. "Гэта нікога не здзівіла", - напісаў Галеацы, маючы на ўвазе цесную сувязь Ратцынгера з Янам Паўлам II.

Сярод іншых тэм: яго моцная, гранітная вера, інтэлектуальныя карані і спадчына, прынцыпы ў галіне біяэтыкі, якія не падлягаюць абмеркаванню, такія як абарона жыцця, сям'і і адукацыйнай свабоды, а таксама яго погляды на эканоміку, якія прыцягнулі ўвагу шматлікіх свецкіх інтэлектуалаў і сталі для ніх арыенцірам.