Святы Пасад у ААН пра крызіс шматбаковай сістэмы
Марыя Валодзіна – Vatican News
Прадстаўнік Святога Пасаду назваў тэму дыскусіі своечасовай і важнай. Свет сутыкаецца з такімі крызісамі, як адсутнасць харчовай бяспекі, масавая міграцыя, надзвычайныя сітуацыі ў галіне аховы здароўя, змена клімату і стыхійныя бедствы, а таксама шматлікія зацяжныя канфлікты, такія як вайна ва Украіне. Гэтыя глабальныя крызісы выпрабоўваюць на трываласць шматбаковую сістэму і "ясна дэманструюць, што мы не можам выратавацца ў адзіночку: усе вялікія выклікі нашага часу глабальныя", - адзначыў дыпламат.
На яго думку, супрацоўніцтву, неабходнаму для вырашэння гэтых праблем, занадта часта перашкаджаюць палітычныя і нацыянальныя інтарэсы, абвінавачванні, маніпуляцыі і адсутнасць палітычнай волі. Дзейнасць міжнародных арганізацый і сістэмы ААН блакуецца, расце палярызацыя сярод членаў.
У гэтай сувязі, прадстаўнік Святога Пасаду нагадаў пра заклік Францішка да абнаўлення шматбаковай сістэмы, рэакцыя якой на глабальныя выклікі дагэтуль была “няпоўнай, несвоечасовай і недастатковай”.
Паводле ватыканскага дыпламата, дапамагчы справіцца з гэтым крызісам шматбаковасці можа вера. Рэлігійныя каштоўнасці – гэта агульначалавечыя каштоўнасці, яны могуць адыгрываць важную ролю ў пераадоленні недахопаў шматбаковай сістэмы.
На заканчэнне, прадстаўнік Святога Пасаду нагадаў словы Францішка да дыпламатычнага корпуса. У сваім штогадовым звароце Папа выказваў пажаданне, каб у ходзе сустрэч і перамоў людзі асэнсавалі адну са сваіх самых галоўных патрэб: каб паміж імі і паміж народамі панаваў не страх, а любоў.
