У Ватыканскай абсерваторыі пройдзе Летняя школа астрафізікі
Марыя Валодзіна – Vatican News
Школа размесціцца ў Кастэль-Гандольфа. Маладыя навукоўцы вернуцца сюды пасля некалькіх гадоў перапынку, выкліканага пандэміяй каронавіруса. Яны будуць наведваць заняткі, працаваць над даследчымі праектамі і падарожнічаць. Акрамя таго, іх прыме на аўдыенцыі Францішак.
Тэма сёлетняй Летняй школы - Вывучэнне сусвету. Інструменты навукі аб вялікіх дадзеных у астранамічных даследаваннях.
З павелічэннем памераў і адчувальнасці тэлескопаў аб'ём астранамічных дадзеных, якія павінны зразумець навукоўцы, значна вырас", - адзначыў дэкан Летняй школы, астраном Ватыканскай і Падуанскай абсерваторый, ксёндз Алесандра Аміцола. Буйныя астранамічныя даследаванні ўжо даследавалі мільярды нябесных крыніц. Будучыя даследаванні збяруць значна больш дадзеных. Навучэнцы летняй школы паглыбяць свае веды ў галіне вялікіх дадзеных і машыннага навучання і атрымаюць практычны досвед аналізу дадзеных, які спатрэбіцца ім пры выкананні ўласных астранамічных праектаў.
Удзельнікі сёлетняй Летняй школы былі абраныя сярод прыкладна 200 кандыдатаў з выдатным патэнцыялам для актыўнай кар'еры ў астраноміі. Яны паходзяць з Аргенціны, Бангладэш, Бразіліі, Даніі, Індыі, Італіі, Іспаніі, Казахстана, Калумбіі, Канады, Кітая, Лівана, Мексікі, Нідэрландаў, ПАР, Славакіі, Славеніі, Уругвая, Харватыі і Чэхіі.
Першая Летняя школа астраноміі была арганізавана ў Ватыкане ў 1986 годзе. Тады ў ёй прынялі ўдзел больш за 400 студэнтаў з усяго свету, больш за 85% з якіх працягваюць і сёння працаваць у якасці прафесійных астраномаў. Некаторыя сталі аднымі з найбольш уплывовых экспертаў у сучаснай астраноміі.
