У Ватыкане ідзе абмеркаванне дапамогі Усходнім Цэрквам
Марыя Валодзіна – Vatican News
19-22 чэрвеня 2023 года ў Рыме адбудзецца 96-я пленарная сесія Асамблеі ініцыятыў дапамогі Усходнім Касцёлам (ROACO), - паведаміла Дыкастэрыя па справах Усходніх Цэркваў.
Праца асамблеі распачалася ў панядзелак, 19 чэрвеня, з пасяджэння арганізацыйнага камітэта. 20 чэрвеня, арцыбіскуп Клаўдыё Гуджэроці, прэфект Дыкастэрыі па справах Усходніх Цэркваў і старшыня ROACO, узначаліць Эўхарыстычнае набажэнства, падчас якога будуць маліцца за мір і за ахвярадаўцаў, а таксама давераць Пану і заступніцтву Маці Божай ход сесій і краіны, якія працягваюць пакутаваць ад наступстваў вайны і грамадска-палітычнай нестабільнасці.
Першае пасяджэнне будзе прысвечана сітуацыі ў Святой Зямлі. Акрамя таго, Дзяржаўны сакратар, кардынал П'етра Паралін, выступіць з дакладам аб дыпламатычных намаганнях Святога Пасада ў дачыненні да Украіны, Блізкага Усходу і Эфіопіі. На вячэрнім пасяджэнні 20 чэрвеня асноўная ўвага будзе нададзена Турцыі і Ірану, а таксама сацыяльна-палітычнай і рэлігійнай сітуацыі ў Эрытрэі.
21 чэрвеня будзе прысвечаны сведчанню маладых людзей, якія прыбылі ў Рым з трынаццаці краін свету, каб паразважаць над роллю моладзі ў дзейнасці на карысць агульнага дабра. Падчас свайго знаходжання ў Вечным горадзе з 16 па 23 чэрвеня трыццаць маладых людзей будуць мець магчымасць пазнаёміцца адзін з адным, памаліцца, паразважаць над рознымі тэмамі, наведаць горад і, нарэшце, падзяліцца сваімі разважаннямі з удзельнікамі пленарнага пасяджэння.
Праца завершыцца пленарнай сесіяй арганізацыйнага камітэта. Чакаецца, што 22 чэрвеня ўдзельнікаў сустрэчы прыме на аўдыенцыі Францішак.
