Першы ватыканскі спадарожнік даставіць на арбіту пасланне надзеі
Аляксандр Панчанка – Vatican News
На борце спадарожніка знаходзіцца пасланне надзеі і міру папы Францішка для ўсяго свету – нанакніга з малітвай Statio Orbi, якую ён прамовіў на бязлюднай плошчы святога Пятра ў самы разгар пандэміі COVID-19, 27 сакавіка 2020 года. 160 старонак кнігі былі змешчаны ў мікрасхеме памерам са шпілечную галоўку, створаную Італьянскім нацыянальным цэнтрам навуковых даследаванняў (CNR).
Спадарожнік быў пабудаваны ў рэкордныя тры месяцы камандай маладых навукоўцаў з Політэхнічнага ўніверсітэта ў Турыне пад кіраўніцтвам Сабрыны Карпіны, прафесара кафедры аэракасмічнай тэхнікі. Ён уяўляе сабой невялікую скрынку і важыць усяго каля трох кілаграмаў. Звонку апарат пакрыты сонечнымі панэлямі, неабходнымі для энергазабеспячэння, а ўнутры, акрамя нанакнігі, знаходзяцца два бартавыя камп’ютары, акумулятар, датчыкі, два магніты для стабілізацыі і два перадатчыкі на ўльтравысокіх частотах: кожныя дзе хвіліны яны будуць перадаваць словы Святога Айца на тэму надзеі і міру для чалавецтва, якія змогуць пачуць радыёаматары ва ўсім свеце.
Касмічная місія Spei Satelles – Спадарожнік надзеі – з’яўляецца сумесным праектам ватыканскай Дыкастэрыі па камунікацыі і Італьянскага касмічнага агенцтва.
