Базіліка святога Пятра запрашае пілігрымаў на малітву за СДМ
Марыя Валодзіна – Vatican News
Базіліка святога Пятра сумесна з Дыкастэрыяй па справах свецкіх, сям’і і жыцця запрашае вернікаў і пілігрымаў, якія ў бліжэйшыя дні наведаюць магілу святога Пятра, суправаджаць малітвай удзельнікаў сусветнай моладзевай сустрэчы ў Партугаліі. Далучыцца да малітвы за моладзь можна будзе падчас цэлебрацыі Святой Імшы ў ватыканскай базіліцы, а таксама падчас штодзённай эўхарыстычнай адарацыі ў капліцы Найсвяцейшага Сакрамэнту, што ў правым нефе базілікі. Зрабіць гэта можна будзе з 8.30 раніцы да 16.30.
Спецыяльная графічная выява пры ўваходзе ў капліцу нагадае наведвальнікам і пілігрымам, якія пажадаюць памаліцца за моладзь, спасылку на старонку сайта базілікі, прысвечаную 37-ым Сусветным дням моладзі. Там яны знойдуць афіцыйны тэкст паслання Святога Айца, а таксама малітвы за СДМ на англійскай, іспанскай, італьянскай, партугальскай і французскай мовах.
