Паралін: кожны нясе адказнасць за дасягненне міру ва Украіне
Марыя Валодзіна – Vatican News
Перамовы па мірным плане для Украіны, прадстаўленым Прэзідэнтам Уладзімірам Зяленскім, прайшлі на Мальце 28-29 кастрычніка 2023 года з удзелам больш за 65 краін. У відэазвароце да ўдзельнікаў сустрэчы кардынал Дзяржсакратар П'етра Паралін пацвердзіў прыхільнасць Святога Пасада справе палягчэння пакут украінскага народа і паабяцаў працягваць намаганні, накіраваныя на вырашэнне гуманітарных пытанняў. Іерарх нагадаў пра неаднаразовыя заклікі Францішка да міру, пра яго запрашэнне спытаць сябе: "Што я раблю сёння для ўкраінскага народа?”
Агульная адказнасць
Мірная ініцыятыва на Мальце служыць абнадзейлівай дэманстрацыяй таго, што ўзброеная канфрантацыя не лічыцца "непазбежным інструментам вырашэння канфліктаў", - лічыць кардынал Паралін. Саміт стаў трэцім раўндам перамоў, падчас якіх Кіеў звярнуўся па міжнародную падтрымку свайго мірнага плану, які складаецца з 10 пунктаў. Той факт, што на сустрэчы прысутнічалі прадстаўнікі многіх дзяржаў і міжнародных арганізацый, сведчыць пра тое, што ў свеце не "змірыліся з трагедыяй, якая разгортваецца на нашых вачах, і што мы маем мужнасць глядзець ёй у вочы". "Пошук рашэння – гэта адказнасць не толькі Украіны, гэта агульная адказнасць", - дадаў кіраўнік ватыканскай дыпламатыі.
Памножыць намаганні
Нягледзячы на працу міжнародных арганізацый па забеспячэнні таго, каб "Украіна змагла абараніць цэласнасць сваёй тэрыторыі, забяспечыць сваім грамадзянам бяспеку і неабходныя для жыцця прадметы першай неабходнасці, а таксама дасягнуць жаданага міру", гэта ўсё яшчэ далёка, - прызнаў кардынал Паралін. Таму патрэбныя яшчэ большыя і творчыя намаганні на ўсіх узроўнях, каб пераадольваць перашкоды і адкрыць шляхі, якія ў цяперашні час здаюцца непрымальнымі або немагчымымі.
Дзяржаўны сакратар паўтарыў заклік Святога Пасада да павагі міжнароднага права, асабліва ў дачыненні да тэрытарыяльнай цэласнасці, і заахвоціў "усе ініцыятывы, накіраваныя на пошук справядлівага і стабільнага міру ва Украіне". Бліжэйшы супрацоўнік Папы запэўніў у падтрымцы намаганняў па вырашэнні “гуманітарных пытанняў, такіх як харчовая бяспека і захаванне навакольнага асяроддзя”, а таксама пацвердзіў гатоўнасць Святога Пасада “працягваць свае намаганні, накіраваныя на палягчэнне пакут украінскага народа і вяртанне палонных і дзяцей ва Украіну".
