Навіны Апостальскай сталіцы цяпер і па-мангольску
Марыя Валодзіна - Vatican News
Дзякуючы супрацоўніцтву з Касцёлам Манголіі ўсе прамовы Святога Айца падчас нядзельнай малітвы Анёл Панскі і катэхезы, з якімі ён звяртаецца да прысутных на агульнай аўдыенцыі па серадах, будуць пераведзеныя і апублікаваныя па-мангольску на старонках партала Vatican News.
"Мы рады гэтай новай магчымасці чытаць словы Святога Айца на мангольскай мове”, - падкрэсліў апостальскі прэфект Улан-Батара, кардынал Джорджа Марэнга. “Гэта плён яго нядаўняга візіту на зямлю пад вечна блакітным небам, які закрануў сэрцы мангольскіх католікаў і людзей іншых рэлігійных перакананняў, станоўча ўражаных вялікім чалавечым і духоўным сведчаннем Папы Францішка. Яго словы пра каштоўнасць нашых традыцый запалі нам у душу, аб гэтым казалі многія людзі. Цяпер вучэнне пераемніка святога Пятра будзе гучаць і па-мангольску. Спадзяемся, што гэты новы інструмент евангелізацыі разгорне ўвесь свой патэнцыял дзякуючы сённяшнім каналах камунікацыі", - сказаў кардынал Марэнга.
"Гэта маленькая рэч, здаецца нам, аднак, такой жа вялікай, як сама Манголія”, - зазначыў прэфект ватыканскай Дыкастэрыі па камунікацыі Паола Руфіні, дадаючы, што місія і служэнне ватыканскіх СМІ заключаецца ў тым, каб “гаварыць на ўсіх мовах, як мага большай колькасці моў” і рабіць гэта не ў адзіночку, а разам з жыхарамі тэрыторый, на якіх ідзе вяшчанне.
“У Касцёле няма вялікага і няма малога. Мангольская мова дапаможа Касцёлу зноў адкрыць для сябе важнасць чагосьці дробнага, маленькага насення. Тое, што мы атрымаем, больш за тое, што даем. Як часта паўтарае Папа Францішак, Бог выяўляе сябе ў драбніцы, Святы Дух заўсёды выбірае малое, таму што не можа ўвайсці ў вялікае, пыхлівае, самадастатковае”, - нагадаў Руфіні.
"Падарожжа ў Манголію ў верасні 2023 года стала незвычайным дзякуючы сведчанню, якое мы ўсе атрымалі ад гэтага маленькага і яшчэ маладога Касцёла, які служыць блізкаму,” - заўважыў галоўны рэдактар СМІ Святога Пасада Андрэа Тарніелі. “У гісторыю ўвайшла зробленая дронам фатаграфія пераемніка святога Пятра з усімі католікамі краіны, якіх налічваецца 1500 чалавек. У знак увагі да гэтай невялікай супольнасці, і каб спрыяць адзінству, дзякуючы супрацоўніцтву з кардыналам Марэнга мы вырашылі адкрыць старонку Vatican News на мангольскай мове, якая стане 52-й мовай ватыканскіх СМІ. Гэта даніна павагі нашым братам і іх евангельскаму сведчанню ў Манголіі”, - сказаў Тарніелі.
"Наша місія – распаўсюджваць Евангелле ў свеце, быць голасам мясцовых Касцёлаў, разглядаць факты праз прызму сацыяльнага вучэння, ніколі не пакідаць нікога ў адзіноце”, - падкрэсліў адказны рэдактар Ватыканскага радыё - Vatican News Масіміліяна Мэнікэці.
“Мы пачалі працаваць над гэтым праектам падчас апостальскага падарожжа Папы ў Манголію, натхнёныя яго падтрымкай гэтай невялікай супольнасці. Мы ўжо пачалі публікаваць тэкставыя навіны на партале Vatican News, пазней могуць з'явіцца і аўдыаматэрыялы. Мы працуем над сінэргічнымі мадэлямі з мясцовымі Касцёламі, каб усё больш распаўсюджваць галасы надзеі, якая змяняе свет”, - зазначыў Мэнікэці.
