У Ватыкане паказалі матчы чэмпіянату Еўропы па футболе
Марыя Валодзіна - Vatican News
У Пасольстве Германіі пры Святым Пасадзе адбыліся паказы двух пераможных матчаў нямецкіх футбалістаў супраць Шатландыі і Венгрыі. Падтрымаць свае зборныя прыехалі пасол Вялікабрытаніі Крыс Трот і пасол Венгрыі Эдуард Габсбург-Латарынгскі, а таксама шматлікія футбольныя заўзятары, некаторыя з якіх былі з сем'ямі. Усіх іх ветліва вітаў арганізатар мерапрыемства, пасол Германіі пры Святым Пасадзе Бернхард Коч.
Трансляцыя матча Германія-Швейцарыя прайшла ў казарме Папскай швейцарскай гвардыі. У ёй прынялі ўдзел больш за 100 чалавек. Большасць гвардзейцаў былі апранутыя ў форму зборнай Швейцарыі. Яны заглушалі сваіх нямецкіх гасцей спевам нацыянальнага гімна і апладысментамі сваёй камандзе, аднак гэта не перашкодзіла ім усім разам назіраць за захапляльнымі момантамі гульні ў радаснай атмасферы, якой спрыяла летняе надвор'е.
"Мы былі вельмі рады магчымасці паглядзець матч Германія-Швейцарыя разам са Швейцарскай гвардыяй. Атмасфера была амаль як на стадыёне, а гасціннасць – кранальная. Вялікі дзякуй Швейцарскай гвардыі і яе камандзіру Крыстафу Графу!” - сказаў у каментары Ватыканскаму радыё пасол Германіі Бернхард Коч.
Абедзьве зборныя выйшлі ў 1/8 фіналу. У бліжэйшы час будзе прынята рашэнне адносна арганізацыі трансляцыі наступных матчаў у Ватыкане або ў пасольстве Германіі пры Святым Пасадзе.
