У Ватыкане працягваецца набор у Школу мастацтваў і рамёстваў
Аляксандр Панчанка - Vatican News
“Школа ўзнікла дзякуючы жаданню кардынала Маўра Гамбэці, які аднавіў старажытную традыцыю Фабрыкі святога Пятра, бо школа ўжо існавала ў XIX стагоддзі. Потым гэта традыцыя перарвалася, але цяпер аднавілася”, - патлумачыў у інтэрв’ю агенцтву SIR айцец Франчэска Аркета, кіраўнік праекта, які сёлета будзе рэалізоўвацца ў Ватыкане ўжо ў трэці раз.
“Нашы работнікі перадаюць унікальныя ў свеце тэхнікі, такія як мазаіка ці цяслярская справа, якім не навучаюць у іншых месцах, і якія, магчыма ўжо не будуць перадавацца, калі гэта пакаленне сыдзе на пенсію. Такім чынам гэта генератыўнасць, перадача эстафеты ад аднаго пакалення другому, гарантуе доўгае жыццё”, - дадаў ён.
Запіс у ватыканскую Школу мастацтваў і рамёстваў працягваецца да 18 жніўня 2024 года. Заяўкі прымаюцца на сайце Фонда Fratelli tutti. На вучобу будуць залічаны 20 студэнтаў ва ўзросце ад 18 да 25 гадоў. Яны будуць размеркаваны па пяці спецыяльнасцях: каменячосы і спецыялісты па апрацоўцы мармуру; муляры, штукары і дэкаратары; цесляры; кавалі; спецыялісты па мазаіцы.
“Школа цалкам бясплатная. Курсы працягваюцца шэсць месяцаў, з кастрычніка па красавік. Вучэбная праграма разлічана на 600 гадзін: 200 гадзін тэарэтычных заняткаў і 400 гадзін адведзена на практыку ў майстэрнях”, - расказаў айцец Аркета.
Выкладчыкамі ў Школе мастацтваў і рамёстваў з’яўляюцца не толькі супрацоўнікі Фабрыкі святога Пятра, але таксама спецыялісты з розных італьянскіх і замежных універсітэтаў. Заняткі праходзяць з панядзелка па пятніцу. Таксама ў вучэбную праграму ўключаны экскурсіі, паездкі, адукацыйныя візіты і семінары. У выходныя дні студэнты вольныя. Навучэнцам забяспечваецца бясплатнае сумеснае пражыванне і магчымасць цэласнага, усебаковага развіцця. “Маладыя людзі, якія хочуць інвеставаць сваё жыццё ў клопат пра прыгажосць, якая з’яўляецца Божым дарам, могуць прыйсці да нас”, - запэўніў айцец Франчэска Аркета.
