Ватыканскія музеі: новыя выставы ў Кастэль-Гандольфа
Марыя Валодзіна - Vatican News
Пачынаючы з 20 верасня 2024 года наведвальнікі папскага палаца ў Кастэль-Гандольфа могуць пабачыць адрэстаўраванае палатно з калекцыі Ватыканскіх музеяў. Гаворка ідзе пра карціну "Малярыя" італьянскай мастачкі Марыі Марцінэці (1864-1937). Дбайная рэстаўрацыя вярнула гэтаму шэдэўру XIX стагоддзя яго першапачатковую прыгажосць. Яна стала магчымай дзякуючы падтрымцы канадскіх мецэнатаў Ватыканскіх музеяў.
Марыя Марцінэці – рымская мастачка, якая спецыялізавалася на ўсходніх сюжэтах, жанравых сцэнах і гістарычных тэмах. У 1889 годзе яна ўдзельнічала ў Сусветнай выставе ў Парыжы, дзе за "Малярыю" атрымала прэстыжную ўзнагароду – срэбны медаль.
Другім выставачным праектам стала экспазіцыя традыцыйных жаночых строяў рэгіёна Чачарыя з калекцыі рымскага Музея цывілізацый. Менавіта ў такую сукенку апранута жанчына на карціне “Малярыя”.
Прэзентацыя новых выставачных праектаў адбудзецца 27 верасня 2024 года, у 11:30, у Папскім палацы ў Кастэль-Гандольфа.
