Дыкастэрыя ініцыюе візітацыю Брацтва Святога Пятра
Аляксандр Амяльчэня - Vatican News
Гаворка ідзе пра імкненне паглыбіць веды аб дзейнасці гэтага Таварыства апостальскага жыцця папскага права і прапанаваць яму найбольш адпаведную падтрымку на шляху наследавання Хрыста.
Візітацыя адбываецца ў кантэксце працэсу суправаджэння інстытутаў, якія былі ў свой час створаны Папскай камісіяй Ecclesia Dei і якія пасля motu proprio Папы Францішка Traditionis Custodes ад 16 ліпеня 2021 года перайшлі ў кампетэнцыю згаданай вышэй Дыкастэрыі.
Брацтва Святога Пятра, заснаванае ў 1988 годзе, аб'ядноўвае святароў-традыцыяналістаў, якія захоўваюць старажытны рымскі абрад у поўнай еднасці са Святым Пасадам. Згуртаванне, заснаванае ў Швейцарыі, узнікла ў выніку складаных падзей у гісторыі Касцёла пасля Другога Ватыканскага Сабора.
Стваральнікі Брацтва, першапачаткова звязаныя з арцыбіскупам Марселем Лефеўрам, зрабілі рашучы крок да еднасці з Рымам, калі іх былы настаўнік выбраў шлях схізмы. Гэты выбар адлюстроўвае іх глыбокае жаданне захаваць літургічную спадчыну Касцёла, заставаючыся ў поўнай камуніі са Святым Пасадам.
Святары Брацтва святога Пятра выкарыстоўваюць літургічныя кнігі 1962 года. Аднак, у адрозненне ад некаторых іншых традыцыяналісцкіх груп, яны прызнаюць законнасць рэформаў Другога Ватыканскага Сабора і дзейнічаюць у цесным супрацоўніцтве з мясцовымі біскупамі.
Такія падзеі, як візітацыя, падкрэсліваюць важнасць захавання традыцый у Каталіцкім Касцёле пры адначасовым забеспячэнні еднасці і паслухмянасці Святому Пасаду.
