Ватыканская прэзентацыя: гістарычная памяць і фармацыя святароў
Аляксандр Амяльчэня - Vatican News
У прэзентацыі ўзялі ўдзел кардынал Лазарус Ю Хын-сік, прэфект Дыкастэрыі па справах духавенства, арцыбіскуп Андрэс Габрыэль Ферада Марэйра, сакратар той жа дыкастэрыі, і прафесар Андрэа Рыкардзі, старшыня Таварыства Дантэ Аліг'еры.
Кардынал Ю падкрэсліў неабходнасць поўнага асабістага і гістарычнага ўсведамлення рэчаіснасці, у якой мы жывём. Ён заклікаў пазбягаць занадта "анёльскага" бачання жыцця і падкрэсліў важнасць сувязі з мінулым. У сучасную эпоху, калі мы матэрыяльна ўзаемазвязаныя, асабліва важна захоўваць памяць і свядомасць, каб будаваць будучыню на трывалым падмурку мінулага.
Арцыбіскуп Ферада Марэйра звярнуў увагу на занепакоенасць Папы слабасцямі ў фармацыі маладых святароў, асабліва ў тых месцах, дзе недаацэньваецца памяць мінулага і пошук праўды. Ён папярэдзіў пра рызыкі павярхоўнага вывучэння і празмернага захаплення хуткімі інфармацыйнымі крыніцамі, што вядзе да распаўсюджвання фэйкаў.
Прафесар Рыкардзі падкрэсліў, што гісторыя Касцёла з'яўляецца часткай агульнай гісторыі розных народаў. Ён адзначыў, што сёння назіраецца розніца паміж "рэлігіяй эмоцый" і гістарычнай свядомасцю традыцыйных Касцёлаў. На яго думку, адмаўленне ад гісторыі вядзе да закрыцця гарызонтаў і няздольнасці разумець час, у якім жыве Касцёл.
Прафесар Эмануэла Прынцывалі, якая ўдзельнічала ў прэзентацыі анлайн, падкрэсліла важнасць сувязі паміж верай і гісторыяй. Яна адзначыла, што Хрыстус уцелаўлёны з'яўляецца найлепшым супрацьяддзем ад дагматызму, бо Ён стаіць на баку пераможаных і дапамагае пазбегнуць трыумфалісцкага прачытання гісторыі Касцёла.
Удзельнікі прэзентацыі выказалі спадзяванне на далейшае супрацоўніцтва паміж рознымі дыкастэрыямі Святога Пасада ў справе абнаўлення фармацыі святароў у духу сінадальнасці.
