Паралін пра гістарычны візіт Папы на Корсіку – чаканні і надзеі
Аляксандр Амяльчэня - Vatican News
Іерарх бачыць у гэтым аднадзённым падарожжы, якое адбудзецца 15 снежня 2024 года, глыбокую сувязь са словамі святога Паўла да Ціта пра жыццё ў цвярозасці, справядлівасці і пабожнасці. Ён падкрэслівае, што прысутнасць Папы ў Ажаксьё стане нагодай для ўсёй мясцовай касцельнай супольнасці перагледзець сваё разуменне хрысціянскага сведчання.
Дзяржсакратар надае асаблівае значэнне канферэнцыі па народнай рэлігійнасці, якую закрые Францішак. Ён нагадвае пра погляды Святога Айца на народную пабожнасць, выкладзеныя ў Evangelii gaudium, дзе яна разглядаецца як сапраўдная евангелізацыйная сіла. "У штодзённых праявах веры – малітве маці за хворае дзіця, працэсіях і пілігрымках – выяўляецца глыбокая тэалагічная праўда", - заўважае ён.
Кардынал Паралін адзначае сімвалічнасць сустрэчы Святога Айца з прэзідэнтам Францыі ў аэрапорце Ажаксьё – у сэрцы Міжземнага мора. Ён прадбачыць, што размова закране тэмы міру, павагі да чалавечага жыцця і міграцыі.
Паводле слоў кіраўніка дыпламатыі Святога Пасада, гэта пытанне патрабуе комплекснага падыходу: прыняцця мігрантаў з павагай да іх годнасці, усталявання справядлівых правіл і супрацоўніцтва з краінамі паходжання.
Разважаючы пра сустрэчу Папы з духавенствам і вернікамі, кардынал Паралін падкрэслівае характэрную рысу Францішка – яго ўважлівасць да мясцовага кантэксту і культуры. Ён мяркуе, што Францішак заахвоціць як вернікаў, так і грамадзянскія ўстановы да дыялогу і супрацоўніцтва дзеля агульнага дабра, асабліва клапоцячыся пра найбольш уразлівых.
Такім чынам, паводле кардынала-дзяржсакратара, нават кароткі візіт Пантыфіка на Корсіку можа стаць моцным імпульсам для духоўнага абнаўлення і грамадскага дыялогу, спалучаючы традыцыйную пабожнасць з актыўным удзелам у вырашэнні сучасных выклікаў.
