Рым рыхтуецца да Юбілею: падсветка каланады і вада для пілігрымаў
Марыя Валодзіна - Vatican News
Такія юбілейныя праекты прадставіла 16 снежня 2024 года італьянская кампанія ACEA, якая працуе ў галіне водных рэсурсаў і электрычнай энергіі.
Падсветка каланады Берніні
Для асвятлення скульптур 140 святых, якія размешчаны на каланадзе ватыканскай плошчы, будзе выкарыстоўвацца тэхналогія светлавой архітэктуры. Новая падсветка зробіць скульптуры бачнымі нават у вячэрняй цемры. Па словах пра-прэфекта Дыкастэрыі па евангелізацыі, арцыбіскупа Рына Фізікелы, гэта не толькі эстэтычнае рашэнне, але і духоўны праект – “матэрыялізацыя сапраўднага духоўнага дыялогу” святых.
Праект ажыццявіла кампанія ARETI, якая адказвае за грамадскае і мастацкае асвятленне Рыма. Замест старых лямпаў ля кожнай скульптуры былі ўсталяваны энергазберагальныя пражэктары з нізкім уздзеяннем на навакольнае асяроддзе. Адзін пражэктар асвятляе статую, другі стварае гульню святла і ценяў, узмацняючы візуальны эфект.
Вада для пілігрымаў
Яшчэ адным ключавым юбілейным праектам кампаніі ACEA стала ўсталяванне 14 кіёскаў з бясплатнай пітной вадой – Дамоў вады (Casа dell’acqua). Яны дазваляюць пілігрымам і турыстам бясплатна атрымаць пітную ваду і зарадзіць мабільныя прылады. Два такіх кіёска месцяцца на тэрыторыі Дзяржавы Ватыкан, астатнія дванаццаць у Рыме, бліз папскіх базілік і ўздоўж юбілейных маршрутаў.
Капілярнае водазабеспячэнне старажытнага Рыма забяспечвалася некалькімі акведукамі. "Ніводны горад не можа пахваліцца такой традыцыяй водазабеспячэння”, - патлумачыла кіраўніца ACEA Барбара Марыналі. Яна выказала спадзяванне на тое, што новы праект не толькі задаволіць смагу пілігрымаў, але і будзе спрыяць распаўсюджанню культуры ўстойлівага і адказнага выкарыстання каштоўных водных рэсурсаў.
У сераду, 18 снежня 2024 года, Францішак благаславіць два ватыканскія Дамы вады. Гэты сімвалічны жэст набывае глыбокі сэнс і сведчыць пра важнасць вады як крыніцы жыцця, духоўнасці і міласэрнасці.
Мабільны дадатак
Кампанія ACEA запусціла таксама мабільны дадатак Acquea, які дазваляе знайсці бліжэйшую крыніцу пітной вады, якіх у Рыме больш за 150 тысяч. Дадатак працуе на трох мовах (італьянскай, англійскай і іспанскай), і дазваляе таксама даведацца пра якасць вады ў пітных фантанах.
Юбілей падлеткаў
Кампанія ACEA плануе таксама падтрымаць Юбілей падлеткаў, які адбудзецца 25-27 красавіка 2025 года. Ён збярэ ў Рыме больш за 100 тысяч хлопцаў і дзяўчат ва ўзросце ад дванаццаці да сямнаццаці гадоў. З гэтай нагоды у школах пройдзе шэраг адукацыйных мерапрыемстваў, прысвечаных ахове і рацыянальнаму выкарыстанню водных рэсурсаў.
