Юбілей-2025: у Ватыкане адкрыецца новы будынак пошты
19 снежня 2024 года на ватыканскай Плошчы святога Пятра адбудзецца ўрачыстае адкрыццё новай пошты.
Марыя Валодзіна - Vatican News
Новы паштовы будынак будзе знаходзіцца на тым жа месцы, што і папярэдняя перасоўная структура, якая дзейнічала з 2010 года. Новая пошта – зборная: яе можна лёгка дэмантаваць і сабраць наноў. Падлога, апорная канструкцыя і мэбля цалкам выраблены з экалагічнага матэрыялу – драўніны.
Пошта будзе аказваць пілігрымам і турыстам такія паслугі, як продаж марак, адпраўка карэспандэнцыі і іншыя. У будынку будзе забяспечаны доступ для людзей з абмежаванымі магчымасцямі.
Цырымонію адкрыцця новай паштовай структуры ўзначаляць кардынал Фернанда Вергес Альсага, старшыня Губернатарата Дзяржавы Ватыкан, і Джузэпэ Ласка, генеральны дырэктар італьянскай паштовай службы Poste Italiane.
18 снежня 2024, 12:40
