Кардынал Тагле ўзначаліў ружанцовую малітву за Папу Францішка

Аляксандр Амяльчэня - Vatican News

25 лютага 2025 года ў Ватыкане сабраліся шматлікія вернікі, духавенства і прадстаўнікі дыпламатычнага корпуса для ўдзелу ў малітве Ружанца ў інтэнцыі Папы. Малітоўнае чуванне ўзначаліў кардынал Луіс Антоніа Тагле, прапрэфект Дыкастэрыі па справах Евангелізацыі – Першай секцыі па евангелізацыі і новых партыкулярных Касцёлах.

"Няхай праз заступніцтва Найсвяцейшай Панны Марыі Францішак адчуе любячую прысутнасць Уваскрослага Пана і салідарнасць хрысціянскай супольнасці", - сказаў іерарх ва ўступным слове. Удзельнікі малітоўнага чування разважалі балесныя таямніцы Ружанца. Кожная з таямніц была папярэджана кароткім чытаннем са Святога Пісання.

Ружанец адмаўляўся на італьянскай мове, хоць сярод шматлікіх вернікаў, якія сабраліся, былі людзі рознага паходжання: жыхары Рыма, духавенства, у тым ліку манахі і манахіні, святары, якія выкладаюць і вучацца ў папскіх універсітэтах. Шырока былі прадстаўлены кардыналы і супрацоўнікі ўстаноў Апостальскай Сталіцы, а таксама чальцы дыпламатычнага корпуса, акрэдытаваныя пры Святым Пасадзе.

Пасля заканчэння Ружанца была адспявана антыфона Salve Regina і Ларэтанская літанія. Схола таксама выканала Oremus pro Pontifice. Малітва завяршылася благаслаўленнем, якое ўдзяліў кардынал Тагле.

Гэтая малітоўная сустрэча стала выразам духоўнай еднасці і падтрымкі ўсяго Касцёла для Францішка, падкрэсліваючы цэнтральную ролю малітвы ў жыцці хрысціянскай супольнасці, асабліва ў момант, калі Касцёл моліцца за здароўе свайго Пастыра.