Гамбэці: няхай вяртанне Папы ў Ватыкан будзе знакам надзеі
Аляксандр Панчанка - Vatican News
Увечары 23 сакавіка 2025 года архіпрэзбітэр Базылікі Святога Пятра правёў на галоўнай ватыканскай плошчы Ружанец у інтэнцыі выздараўлення Папы Францішка.
“Што ж, гэта вялікая радасць, што Папа вярнуўся дадому, і мы хочам падзякаваць Богу разам з Марыяй. Дарагія браты і сёстры, аб’яднаныя сэрцам і духам, мы зноў збіраемся ў малітве за нашага любага Святога Айца, Папу Францішка, якога Касцёл з вялікім даверам чакаў у гэты час хваробы. Няхай яго вяртанне дадому, сюды, у Ватыкан, у сэрца Касцёла, стане знакам надзеі для ўсіх, хто цяпер з мужнасцю і даверам перажывае час пакут”, - пажадаў кардынал Гамбэці.
“Наша малітва, якая суправаджала яго на працягу гэтага неспакойнага месяца, працягваецца і ператвараецца ў просьбу да Пана, каб Ён благаславіў яго хутчэйшае і поўнае выздараўленне, аднаўленне сіл і здароўя, каб ён і надалей вёў Божы народ з любоўю, мудрасцю і верай”, - дадаў іерарх, заклікаючы прысутных на плошчы разам паразважаць над таямніцамі святога Ружанца, просячы заступніцтва Марыі, Маці Касцёла, каб яна і надалей падтрымлівала Папу сваёй мацярынскай апекай.
Як і ў мінулыя дні, Ружанец за Папу на Плошчы Святога Пятра маліліся шматлікія кардыналы, арцыбіскупы і біскупы, якія служаць у ватыканскіх установах, дыяцэзіяльнае і манаскае духавенства, а таксама вернікі Рымскай дыяцэзіі і пілігрымы з усяго свету, якія прыбылі ў Вечны Горад.
