У Ватыкане прайшла прэзентацыя саміту па даўгалецці
Марыя Валодзіна - Vatican News
У прэс-канференцыі прынялі ўдзел вядучыя эксперты ў галіне старэння і паляпшэння якасці жыцця ў пажылым узросце. Яны выказалі радасць з нагоды вяртання Святога Айца ў Ватыкан і пажадалі яму далейшага выздараўлення.
Як адзначыў старшыня Папскай акадэміі жыцця, арцыбіскуп Вінчэнца Палья, добрая старасць з'яўляецца паказчыкам цывілізацыйнага развіцця грамадства. Ён падкрэсліў, што даўгалецце павінна разглядацца не як біялагічнае дасягненне, а як магчымасць паважаць і інтэграваць пажылых людзей у грамадства. “Пажылыя – гэта не цяжар, а каштоўны рэсурс грамадства”, - падкрэсліў іерарх.
Папа Францішак неаднаразова казаў аб тым, што “народ, які не клапоціцца пра сваіх пажылых людзей, не мае будучыні". У гэтым кантэксце роўны доступ да навуковых адкрыццяў становіцца ключавым пытаннем. Біямедыцынскія інавацыі павінны служыць усім, незалежна ад сацыяльна-эканамічнага статусу, каб не толькі падаўжаць жыццё, але і паляпшаць яго якасць, прадухіляючы дэгенератыўныя захворванні і гарантуючы кожнаму магчымасць здаровага і годнага старэння, - сказаў арцыбіскуп Палья.
Нейрахірург Джуліа Майра падняў шэраг пытанняў у дачыненні да даўгалецця, адно з іх – гендэрныя адрозненні ў старэнні мозгу. Мужчыны і жанчыны старэюць па-рознаму: гарманальныя, генетычныя і метабалічныя адрозненні ўплываюць на зніжэнне кагнітыўных здольнасцяў і рызыку развіцця нейрадэгенератыўных захворванняў. Аднак навуковыя даследаванні часта не ўлічваюць гэтыя адрозненні, што прыводзіць да прабелу ў ведах, які непасрэдна ўплывае на прафілактыку і лячэнне.
Прафесар Венкатраман Рамакрышнан, лаўрэат Нобелеўскай прэміі па хіміі 2009 года, спытаў "Калі мы ўсе пачнём жыць даўжэй, якім будзе наша грамадства?" Ён адзначыў, што існуе верагоднасць павелічэння няроўнасці. "Калі павялічыцца працягласць жыцця і з'явяцца новыя метады лячэння, то можа паўстаць двухузроўневае грамадства, у якім некаторыя жыхары багатых краін будуць жыць даўжэй", - патлумачыў ён.
Ватыканскі саміт па даўгалецці “Змаганне з хадой часу” пройдзе ў другой палове дня ў Канферэнц-цэнтры “Аўгусцініянум” па адрасе Віа Паола VI, 25 у Рыме. З прывітальным словам да яго ўдзельнікаў звернецца Дзяржсакратар П'етра Паралін.
