Була Папы Баніфацыя VIII аб правядзенні Юбілею 1300 года

ВАТЫКАН

Ватыканскія музеі: выстава рэдкіх дакументаў аб Юбілеях

У межах святкавання Юбілейнага года ў Ватыканскіх музеях адкрылася выстава “Юбілеі. Рарытэтныя дакументы з калекцый Ватыкана”, якая прадстаўляе ўнікальныя пісьмовыя сведчанні аб адметнасцях юбілейных святкаванняў на працягу гісторыі.

Аляксандр Панчанка - Vatican News

Выстава размясцілася ў залах Папы Паўла V, непадалёк ад знакамітай Сікстынскай капэлы, і з’яўляецца вынікам супрацоўніцтва Ватыканскіх музеяў і Апостальскага архіва. Яна дае магчымасць наведвальнікам убачыць дакументы, што асвятляюць гісторыю Юбілеяў праз прызму веры, мастацтва і пілігрымства.

Адзін з самых каштоўных экспанатаў – арыгінал булы “Antiquorum habet” Папы Баніфацыя VIII, якой быў абвешчаны першы Юбілей, што святкаваўся ў 1300 годзе. Гэты дакумент будзе экспанавацца ўсяго некалькі месяцаў, пасля чаго на выставе будзе размешчана яго копія, што звязана з неабходнасцю забеспячэння належных умоў захавання арыгіналу.

Наведвальнікі змогуць убачыць таксама булу “Ineffabilis providentia” Папы Паўла II ад 1470 года, якой было ўстаноўлена святкаванне Юбілеяў у Касцёле кожныя 25 гадоў. Яшчэ адзін цікавы экспанат - була “Salvator Noster” Папы Сікста IV ад 1472 года, якой Пантыфік заклікаў уладальнікаў заездаў забяспечваць прыстойныя ўмовы пражывання для пілігрымаў і не завышаць кошты.

На выставе прадстаўлены таксама цагліны, малаткі і інструменты, якія выкарыстоўваюцца падчас адкрыцця і закрыцця Святых Брамаў. Асабліва варта адзначыць пілігрымскі посах XVII стагоддзя, аздоблены сцэнамі са Старога і Новага Запавету, выявамі Базілікі Святога Пятра і гербам Папы Інакенція X.

Дзякуючы выставе, якая будзе праходзіць на працягу ўсяго Святога года, наведвальнікі Ватыканскіх музеяў атрымаюць унікальную магчымасць дакрануцца да гісторыі Юбілеяў, іх сімволікі і ролі ў духоўным жыцці Каталіцкага Касцёла.