Համաշխարհային և աւանդական կրօններու առաջնորդներու համագումարները

Մարիամ Երեմեան – Վատիկան

Համաշխարհային և աւանդական կրօններու առաջնորդներու համագումարները սկիզբ առած են 2003-ին Նուր Սուլթանի, երբեմնի Ասթանայի մէջ՝ Ղազախստանի Հանրապետութեան առաջին նախագահ Նուրսուլթան Նազարբայևի նախաձեռնութեամբ:

Համագումարը եզակի իրադարձութիւն էր, քանի որ առաջին անգամ ողջ կրօնական աշխարհի ներկայացուցիչները հաւաքուելով մէկ վայրի մէջ՝ ստեղծեցին​​միջազգային մշտական հաստատութիւն մը՝ միջկրօնական երկխօսութիւնը երաշխաւորելու նպատակով։

Այս տարի ան տեղի կ’ունենայ սեպտեմբերի 14-էն 15-ը, Նուր Սուլթանի Անկախութեան պալատէն ներս  և նուիրուած է առաջնորդներու դերին` յետհամաճարակային շրջանի՝ մարդկութեան հոգևոր և սոցիալական զարգացման ի սպաս։

Համաժողովները կը կազմակերպուին երեք տարին մէկ անգամ, հետևաբար՝ 2006, 2009, 2012, 2015 և 2018 թուականներուն: Բացառութիւն կը կազմէ այս վերջինը, որ պէտք էր կայանար 2021-ին, սակայն համավարկի պատճառաւ յետաձգուեցաւ 2022 թուականին:

Անոր մասնակցած են իսլամ, քրիստոնեայ, հրեայ, պուտտիսթ և այլ աւանդական կրօններու առաջնորդներ և ականաւոր ներկայացուցիչներ և իւրաքանչիւր հանդիպում եզրափակուած է ամփոփիչ փաստաթուղթի հրապարակումով, որ կը պարունակէ յայտարարութիւններ և կոչեր՝ ուղղուած աշխարհի ժողովուրդներուն և Պետութիւններու կառավարութիւններուն։ Քննարկումներու առանցքը միշտ եղած է միջկրօնական երկխօսութեան խթանումը` յանուն խաղաղութեան և զարգացման և կրօնական առաջնորդներու կարևոր դերը միջազգային անվտանգութեան ամրապնդման գործին մէջ։