Քամիշլիի Հայ Կաթողիկէ Աթոռանիստ Եկեղեցւոյ մէջ Սուրբ Պատարագ նուիրուած Աստուծոյ Ծառայ Կարդինալ Գրիգոր Պետրոս ԺԵ Աղաճանեանին
Ռոպէր Աթթարեան - Վատիկան
Կիրակի 29 Յունուար 2023ին, Քամիշլլի Հայ Կաթողիկէ Աթոռանիստ Եկեղեցւոյ մէջ պատարագ մատուցեց հովուական այցելութեամբ այս օրերուն Ճէզիրէի մէջ գտնուող Պէյրութի Թեմի Հայ Կաթողիկէ պատրիարքական օգնական եպիսկոպոս` Արհ. Գերապայծառ Գէորգ Ասատուրեանը։
Սուրբ զոհը, որուն իրենց մասնակցութիւնը բերին մեծ թիւով հաւատացեալներ նուիրուած էր Աստուծոյ Ծառայ երջանկայիշատակ Գրիգոր Պետրոս ԺԵ Աղաճանաենին, որուն սրբադասման դատին բացումը տեղի ունեցաւ Հռոմի մէջ անցեալ տարուայ Հոկտեմբեր ամսոյն ընթացքին։
Գերապայծառ Տէրը Սուրբ Զոհի ընթացքին արտասանած յաւուր պատշաճի քարոզը եւս կեդրոնացուց հայոց մեծանուն հայրապետի տիպարին, գործունէութեան ու մեզի թողած պատգամին ու ժառանգութեան վրայ, խօսելով նաեւ դատական գործընթացի հանգրուաններու մասին ու պատարագի աւարտին բոլորին բաշխելէ ետք երջանկայիշատակ Հայ Ծիրանաւորին սրբապատկերը հրաւիրեց հաւատացեալները միասնաբար աղօթելու անոր նուիրուած աղօթքը խնդրելով նաեւ որ այդ աղօթքը շարունակեն կատարել նաեւ յառաջիկայ օրերուն, ու եկող ամիսներուն ընթացքին, մինչեւ այն օր երբ Հայ Կաթողիկէ Եկեղեցւոյ ԺԵ հայրապետը հասնի Խորաններու պատուոյն ու դասուի սուրբերու շարքին։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
