Վաղը սկիզբ կ՛առնէ Ռաֆայէլ Պետրոս ԻԱ կաթողիկոս պատրիարքին հովուապետական անդրանիկ այցը Հալէպ

Վատիկան Նիուզ - Հայկական Բաժանմունք

Հայ Կաթողիկէ Պատրիարքարանի լրատուական գրասենեակի հրապարակած յայտարարութեամբ մը կը տեղեկացուի որ այսօր` 24 օգոստոսի առաւօտեան, Տանն Կիլիկիոյ Կաթողիկէ Հայոց Ամենապատիւ եւ Գերերջանիկ Տէր Ռաֆայէլ Պետրոս ԻԱ. Կաթողիկոս Պատրիարքը մեկնեցաւ դէպի Սուրիա, ուր հովուապետական պատմական այցելութիւն մը պիտի կատարէ Հալէպի թեմին:

Հոգեւոր Տիրոջ կ'ընկերակցին՝ Արհի. Գէորգ Եպս. Ասատուրեան, Տէր Կարապետ քհնյ. Թադէոսեան, Տէր Րաֆֆի քհնյ. Յովհաննէսեան եւ Հայ Կաթողիկէ Պատրիարքութեան հասարակութեան հետ կապերու պատասխանատու Շարպէլ Պասթուրի:

Առաջին օր` 25 օգոստոս 2023

Ուրբաթ 25 Օգոստոս 2023-ին Տանն Կիլիկիոյ Կաթողիկէ Հայոց Կաթողիկոս Պատրիարք Ամենապատիւ եւ Գերերջանիկ Տ. Տ. Ռաֆայէլ Պետրոս ԻԱ Հալէպ կը ժամանէ կէսօրէն ետքը ժամը չորսին, որով սկիզբ կ՛առնէ Հայ Կաթողիկէ Եկեղեցւոյ Հովուապետին Հալէպ հովուական անդրանիկ այցելութեան յայտագիրը։

Հալէպ ժամանումին նախատեսուած է «ընդունելութիւն Հալէպի մուտքին Համայնքի Եկեղեցական դասին կողմէ», եւ ապա փոխադրութիւն դէպի ՇԻՐԱԹՕՆ Պանդոկ:

Երեկոյեան ժամը 18։00-ին, տեղի կ՛ունենայ պաշտօնական ընդունելութիւն Ս. Խաչ եկեղեցւոյ առջեւ մասնակցութեամբ Հալէպի Քրիստոնեայ Համայնքապետերու, վարդապետներու, քահանաներու, Մայրապետներու, հաւատացեալ ժողովուրդին եւ Համայնքիս Շեփորախումբին:

Պաշտօնական ընդունելութեան կը յաջորդէ «Գոհութեան եւ Փառաբանութեան Աղօթք» որուն ընթացքին Թեմիս Առաջնորդ` Արհի. Տ. Պետրոս Արք. Միրիաթեանը, հայրերէն եւ արաբերէն լեզուներով կ՛ուղղղէ իր բարի գալուստի խօսքը որմէ ետք Ամեն. եւ Գերջ. Հոգեւոր Տէրը կ՛արտասանէ իր սրտի խօսքը ու աղօթքի պահը Հոգեւոր Տիրոջ Օրհնութեամբ որուն կը յաջորդէ ընդունելութիւն եկեղեցւոյ Դահլիճէն ներս։

Երկրորդ օր

Շաբաթ 26 Օգոստոս 2023ի օրակարգը կը նախատեսէ բացում Ճէպէլ Սէյտէի Համայնքի վերանորոգ բնակարաններուն, ներկայութեամբ վերանորոգութեան ծրագրին օժանդակող Հաստատութիւններուն, առաւօտեան ժամը 10։00-ին ապա երեկոյեան ժամը 18։00-ին, Ժամերգութեան արարողութիւն որուն ընթացքին կը կատարուի նաեւ ` նորանշանակ եպիսկոպոս Գերապ. Ներսէս Յովսէփ Զապարեանի Եպիսկոպոսական օծման կարգի առաջին մասը, Թիլէլի Մայր Օգնութեանց Աթոռանիստ եկեղեցւոյ մէջ։

Երրորդ օր` Կիրակի 27 Օգոստոս

Կիրակի 27 Օգոստոս 2023ի առաւօտեան ժամը 9։45-ին, Ամենապատիւ Հոգեւոր Տէրը կը ժամանէ Նոր Գիւղ շրջանի Ս. Երրորդութիւն եկեղեցի որուն մուտքին տեղի կ՛ունենայ պաշտօնական ընդունելութիւն որմէ ետքը Ան ժամը 10։00-ին կը գլխաւորէ Հայրապետական Ձայնաւոր Ս. Պատարագը որուն առիթով կը յիշատակուի նաեւ Հոգեւոր Տիրոջ Քահանայական Ձեռնադրութեան 50 Ամեակը:

Ս. Պատարագի աւարտին նախատեսուած է աջահամբոյր եկեղեցւոյ մէջ:

Կիրակի օրը երեկոյեան ժամը 17։00-ին, դպիրներու, սարկաւագներու, վարդապետներու, եպիսկոպոսներու շքեղ թափօրով, գլխաւորութեամբ Ամենապատիւ եւ գերերջանիկ Հոգեւոր Տիրոջ, սկիզբ կը տրուի` Իրաքի Հայ Կաթողիկէներու առաջնորդ` Գերյ. Ներսէս Յովսէփ Թ.Ծ.Վրդ. Զապարեանի եպիսկոպոսական Ձեռնադրութեան որուն աւարտին շնորհաւորութիւնները կ՛ընդունին եկեղեցւոյ դահլիճէն ներս:

Չորրորդ օր

Երկուշաբթի 28 Օգոստոս 2023ի առաւօտեան ժամը 10։00-էն 11։00, Ամենապատիւ Հոգեւոր Տէրը կ՛ընդունի Քրիստոնեայ եւ Իսլամ Համայնքապետերը Հայ Կաթողիկէ Առաջնորդարանէն ներս ապա 11։00 –13։00. կ՛ընդունի պետական պատասխանատու մարմիններու եւ Միութիւններու ներկայացուցիչները, հուսկ

կէսօրէն ետք ժամը 5-էն 7-ը կ՛ընդունի Համայնքիս Յանձնախումբերը եւ հաւատացեալները:

Երեկոյեան ժամը 20։30-ին, Ս. Երրորդութիւն եկեղեցւոյ Աղաճանեան սրահէն ներս: տեղի կ՛ունենայ Գեղարուեստական Յայտագիր` ի պատիւ Ամենապատիւ Հոգեւոր Տիրոջ որուն ընթացքին Գառնի Պարախումբը կը ներկայացնէ հայկական ճոխ պարեր։

Հինգերորդ օր` 29 Օգոստոս 2023

Հովուական այցելութեան հինգերորդ օրը` Երեքշաբթի 29 Օգոստոսին Ռաֆայէլ Պետրոս ԻԱ կաթողիկոս պատրիարքը ընկերակցութեամբ Բերիոյ Թեմի հայ կաթողիկէներու առաջնորդ Արհի. Տ. Պետրոս Արք. Միրիաթեանի, այցելութիւն կու տայ Հալէպի Նահանգապետին եւ Կուսակցապետին:

Ապա ժամը 11։00-ին, նորօծ Եպիսկոպոսը կը մատուցէ իր Եպիսկոպոսական Ձայնաւոր անդրանիկ Ս. Պատարագը Հանդիսապետութեամբ Ամեն. Հոգեւոր Տիրոջ. Մայր Օգնութեանց Աթոռանիստ եկեղեցւոյ մէջ որուն կը յաջորդէ «Աջահամբոյր Առաջնորդարանիս Դահլիճէն ներս»:

Յետմիջօրէին ժամը 15։00-էն 19։00, այցելութիւն Հալէպի Ամաուի Մզկիթին եւ հին թաղերուն ու շուկաներուն:

Վեցերորդ օր

Չորեքշաբթի 30 Օգոստոս 2023-ին առաւօտեան Ամենապատիւ Հոգեւոր տէրը այցելութիւն կու տայ Հալէպի Մուֆթիին, Իսլամ Կալուածներու Տնօրէնին եւ Հ. Հ. Հալէպի Գլխաւոր Հիւպատոսին ապա փոխ այցելութիւններ կը կատարէ Համայնքապետերուն եւ եկեղեցիներուն ինչպէս նաեւ Անարատ Յղութեան Հայ Քոյրերու Վանք:

Երեկոյեան ժամը վեցին Նորօծ Եպիսկոպոսը կը պատարագէ Ս. Խաչ եկեղեցւոյ մէջ, հանդիսապետութեամբ Ամեն. Հոգեւոր Տիրոջ։

Եօթներորդ եւ վերջընթեր օր

Հինգշաբթի 31 Օգոստոս 2023ին Տանն Կիլիկիոյ Կաթողիկէ Հայոց Հայրապետը

կը շարունակուի Համայնքապետերու եւ եկեղեցիներու իր փոխ այցելութիւնները մինչ երեկոյեան կը հանդիպի «Զուարթուն» խումբին հետ` Աղաճանեան սրահէն ներս ու պաշտօնական այցելութիւն կու տայ Ս. Փրկիչ-Պարպարա Եկեղեցւոյ ուր երեկոյեան ժամը 18։00-ին, Ս. Սիրտ Յիսուսի եղբայրութեան Ս. Պատարագը կը մատուցանէ նորօծ Եպիսկոպոսը` Հանդիսապետութեամբ՝ Ամեն. Հոգեւոր Տիրոջ։

Ուրբաթ 1 Սեպտեմբեր 2023 առաւօտեան ժամը 9։30-ին, Ամեն. եւ Գերջ. Հոգեւոր Տէրը հրաժեշտ առնելէ ետք Հալէպի ծուխէն կ՛աւարտէ իր Հովուական անդրանիկ այցելութիւնը ու կը մեկնի դէպի Լիբանան` իր նստավայրը։