Գամիշլիի մէջ Սուրբ Հաղորդութեան Երկրպագութիւն "Միջին Արեւելքի Խաղաղութեան" դիտաւորութեամբ
Վատիկան Նիուզ
Կիրակի 26 Նոյեմբեր 2023, Բ. Կիրակի Յիսնակաց, երեկոյեան ժամը վեցին, Գամիշլիի Կաթողիկէ Հայոց Սուրբ Յովսէփ Աթոռանիստ Տաճարին մէջ տեղի ունեցաւ Երկրպագութիւն Սուրբ Հաղորդութեան ջերմեռանդութիւնը նուիրուած "ՄԻՋԻՆ ԱՐԵՒԵԼՔԻ ԽԱՂԱՂՈՒԹԵԱՆ" դիտաւորութեան, մասնակցութեամբ տեղւոյն Ասորի եւ Քաղդէացի Կաթողիկէ քահանաներու։
Արարողութեան ներկայ էին նաեւ երեք կաթողիկէ համայնքներու երիտասարդաց միութիւնները եւ հաւատաւոր ժողովուրդի հոծ բազմութիւն, որոնք միասնաբար աղօթեցին ու Տիրոջմէ հայցեցին խաղաղութեան շնորհքը համայն աշխարհին համար ու մասնաւորապէս Միջին Արեւելքին ու անոր բնակիչներուն համար։
Ջերմեռանդական աղօթքին նախագահեց Գերյ. Հայր Գառնիկ Ծ. Վրդ. Յովսէփեանը՝ որ աւարտին իր խորին շնորհակալութիւնը յայտնեց բոլոր ներկաներուն, կազմակերպիչներուն եւ երգչախումբի բոլոր անդամներուն հրաւիրելով խաղաղութեան համար աղօթքը շարունակելու նաեւ իրենց առօրեային մէջ Ամենակալ Աստուծմէ հայցելով, որ ողորմի իր զաւակներուն վրայ, հեռու պահէ զանոնք վտանգներէն ու հալեցնէ կարծրացած սրտերը։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
