Գերյ. Հ. Բարսեղ Ծ.Վրդ. Պաղտասարեանի օգնական Եպիսկոպոս ընտրուելու` կոչման կարգը Զմմառու մայրավանքին մէջ

Ուրբաթ, 14 Յունիս 2024-ի, կէսօրուայ ժամը 12։30-ին, Զմմառու Վանքի "Փոխման Սուրբ Կուսին" մայր եկեղեցւոյ մէջ, Փոքր ժամերու աղօթքէն ետք, Ձեռամբ` Տանն Կիլիկիոյ Կաթողիկէ Հայոց Ն.Ա.Գ.Տ.Տ.Ռաֆայէլ-Պետրոս ԻԱ Կաթողիկոս Պատրիարքի ընթացք առաւ` Գերյ. Հ. Բարսեղ Ծ.Վրդ. Պաղտասարեանի` հիւսիսային ԱՄՆ-ի «Տիրամայր Նարեկի» հայ կաթողիկէ Թեմի օգնական Եպիսկոպոս ընտրուելու` կոչման կարգը։

Խատաւիլակութեամբ` Պէյրութի թեմի Պատրիարքական Փոխանորդ` Գերպծռ.Գաբրիէլ Թ.Ծ.Վրդ Մուրատեանի։ Ներկայութեամբ` ԱՄՆ-ի Կաթողիկէ Հայոց Առաջնորդ` Արհ.Տ.Միքայէլ Եպս. Մուրատեանի, Իրաքի Կաթողիկէ Հայոց Թեմի Առաջնորդ` Արհ. Տ. Ներսէս Եպս. Զապարեանի, Հունգարիոյ Կաթողիկէ Հայոց Թեմի ժողովրդապետ` Գերյ. Հ. Մաշտոց Ծ.Վրդ. Զահթէրեանի, Դամասկոսի Կաթողիկէ Հայոց Թեմի ժողովրդապետ` Գերյ. Հ. Գէորգ Ծ.Վրդ. Պահէի, Պէյրութի Կաթողիկէ Հայոց եկեղեցիներու ժողովրդապետերու եւ կղերաց դասին նաեւ Անարատ Յղութեան հայ Քոյրերու։

Հայրապետական թափօրը` առընթերակայութեամբ` Պոլսոյ Կաթողիկէ Հայոց Թեմի ժողովրդապետ` Գերյ. Հ. Վարդան Ծ.Վրդ. Գազանճեանի եւ Գերյ. Հ. Նարեկ Ծ.Վրդ. Մնոյեաի աւանդատունէն խորան բարձրացաւ, ուր կոչեալ Եպիսկոպոսը ծնկադիր եւ երկիւղածութեամբ` յայտարարեց իր հաւատքի դաւանութիւնը եւ ուխտեց` հնազանդիլ Սրբազան Քահանայապետին եւ Ամեն. եւ Գերերջ. հոգեւոր Տիրոջ։

Արարողութենէն ետք` Վանքի սեղանատան մէջ տեղի ունեցաւ հացկերոյթ։

Աղբիւրը` Զմմառու Պատրիարքական Միաբանութիւն