Ռաֆայէլ Պետրոս ԻԱ հանդիպումը Կարդինալ Փարոլինին հետ

Երկուշաբթի, 16 Դեկտեմբեր 2024-ին, Վատիկանի պետքարտուղար կարդինալ Փիեթրօ Փարոլին Վատիկանի մէջ ընդունեց Տանն Կիլիկիոյ Կաթողիկէ Հայոց Ն.Ա.Գ.Տ.Տ. Ռաֆայէլ-Պետրոս ԻԱ. Կաթողիկոս-Պատրիարքը, ընկերակցութեամբ դատաւոր Հայր Աւետիք Վրդ. Յովհաննէսեանի:

Հանդիպումին ընթացքին, երկու կողմերը քննարկեցին Միջին Արեւելքը յուզող հարցերը, անդրադառնալով յատկապէս Լիբանանի եւ Սուրիոյ մէջ վերջին զարգացումներուն, ինչպէս նաեւ տարբեր ոլորտներուն մէջ Հայ Եկեղեցիին դիմագրաւած մարտահրաւէրներուն:

Այնուհետեւ, մտերիմ մթնոլորտի մը մէջ ընթացող այս հանդիպումին, Ամենապատիւ Հոգեւոր Տէրը բարձր գնահատեց կարդինալ Փարոլինին բացառիկ դերն ու անոր ջանքերը ի նպաստ խաղաղութեան ու կայունութեան տարածաշրջանէն ներս, ընդգծելով նաեւ՝ միացեալ աշխատանքին կարեւորութիւնը՝ յաղթահարելու համար բոլոր տագնապները եւ ամրապնդելու քրիստոնեաներուն ներկայութիւնը Միջին Արեւելքին մէջ:

Հանդիպումը վերջ գտաւ փոխադարձ բարեմաղթանքներով Սուրբ Ծննդեան օրհնաբեր տօնին առիթով, շեշտելով նաեւ երկխօսութեան ու համագործակցութեան անհրաժեշտութեան վրայ, բոլոր ժողովուրդներուն համար փայլուն ու կայուն ապագայ մը կերտելու համար:

Դիւան Հայ Կաթողիկէ Պատրիարքութեան