Ֆրանչիսկոս Պապը դարձաւ Ասդիի Պատուաւոր Քաղաքացի
Ռոպէր Աթթարեան - Վատիկան
Ասդի կատարած երկօրեայ այցելութեան առիթով, Կիրակի 20 նոյեմբերի առաւօտեան Ֆրանչիսկոս Պապը Ասդիի առաջնորդարանին մէջ ընդունեցաւ Ասդի քաղաքի քաղաքապետ Տիար Մաուրիցիօ Ռազերոն ու Ասդիի Նահանգապետ Ալպերթօ Չիրիոն, անոնց ընկերացող պատուիրակութեան անդամներուն հետ միասին։
Հանդիպումին առիթով Ասդիի քաղաքապետը Ֆրանչիսկոս Պապին շնորհեց քաղաքի պատուոյ քաղաքացիութիւնը, Անոր «աշխարհի մէջ խաղաղութեան ի սպաս զօրեղ յանձնառումին համար եւ ամենօրեայ զօրակցութեան եւ եղբայրութեան պատգամներուն համար` ի դէմ որեւէ տեսակ խտրականութեան» նշուած է պատուոյ քաղաքացիութեան շնորհման փաստաթուղթին մէջ։
Հանդիպումէն ետքը Սրբազան Պապը Քահանայապետական սպիտակ ինքնաշարժով ուղղուեցաւ Ասդիի կեդրոնը գտնուող քաղաքի Աթոռանիստ Եկեղեցի ուր Քրիստոս Թագաւոր Տիեզերքի տօնին առիթով գլխաւորեց Երիտասարդներու Համաշխարհային թեմական օրուան նուիրուած սուրբ պատարագը եւ նոյն վայրէն արտասանեց Հրեշտակ Տեառն Մարեմեան աղօթքը։
Նշենք թէ Նորին Սրբութեան առաջին օրուան յայտագիրը կը նախատեսէր առանձնական հանդիպումներ իր ազգականներուն թէեւ Ան ժամանակ գտաւ այցելելու նաեւ իր մէկ զարմուհիին տան մօտ գտնուող ծերանոց մը։
Ֆրանչիսկոս Պապը Ասդիի Եպիսկոպոսին կէսօրուայ ճաշի հիւրը հանդիսանալէն ետքը կ՛ուղղուի քաղաքի «Censin Bosia» մարզադաշտ ուր հանդիպելէ ետք 1.340 մանուկներու հետ, կը բարձրանայ ինքնաթիր վերադարձ կատարելու համար Վատիկան։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
