Ֆրանչիսկոս Պապին լսատեսողական պատգամը Ացիոնէ Քաթթոլիքայի աշակերտութեանց. Փոխել իրականութիւնը։
Ռոպէր Աթթարեան - Վատիկան
«Աշակերտներ, որոնք իրականութիւնը կը փոխեն»։ Ացիոնէ Քաթթոլիքայի մէկ նախաձեռնութեան բնաբանն է սա, որուն առիթով անցեալ 25 Մարտին Ֆրանչիսկոս Պապը Ացիոնէ Քաթթոլիքա բանուորական շարժումի եւ Սուրբ Սիրտ կաթողիկէ համալսարանի եկեղեցական ընդհանուր առաջնորդ Գերապայծառ Քլաուտիօ Ճուլիոտորիին շնորհած ունկնդրութեան ընթացքին արձանագրեց հակիրճ լսատեսողական պատգամ մը, շեշտը դնելով «իրականութիւնը փոխել» նիւթին վրայ։
«Շիտա՞կ է այս մէկը։ Դուք կարո՞ղ էք իրականութիւնը փոխել» հարց տուաւ Քահանայապետը պատգամին սկիզբը ապա զգուշացուց զանոնք` «որովհետեւ կայ բարի իրականութիւն մը բայց նաեւ գէշ իրականութիւն» եւ «ահա այս վերջինս է, որ պէտք է փոխել» ըսաւ Ան, հուսկ քաջալերեց երիտասարդները, որ իրենց երազները իրականացնեն ու փոխեն իրականութիւնը։
«Թոյլ տուէք, որ ուրիշները ձեզի օգնեն, միշտ երկխօսութեան մէջ մնացէք տարեցներուն հետ։ Այդ երկխօսութիւնը կարեւոր է» ըսաւ Սրբազան Պապը, «բայց փոխեցէք իրականութիւնը», շեշտեց Ան, շնորհակալութիւն յայտնելով աշակերտներուն «իրականութիւնը փոխելու իրենց յանձնառումին համար», ապա իր աղօթքները հաւաստիացնելով անոնց խնդրեց` որ նոյնը ընեն իրեն համար։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
