Ֆրանչիսկոս Պապին 41 առաքելական ճամբորդութեան վերջին օրուայ յայտագիրը
Ռոպէր Աթթարեան - Վատիկան
Կիրակի 30 ապրիլին Ֆրանչիսկոս Սրբազան Քահանայապետին Հունգարիոյ մայրաքաղաք Պուտափեշտ կատարած առաքելական ճամբորդութեան երրորդ օրուայ յայտագիրը կը նախատեսէ «Քոսսութ Լայոս» հրապարակին վրայ եզրափակիչ Պատարագը, որուն ընթացքին Սրբազան Քահանայապետը կը ներկայացնէ յաւուր պատշաճի քարոզը եւ արարողութեան աւարտին նոյն վայրէն կ՛արտասանէ «Ողջ Լեր Թագուհի մարեմեան աղօթքը։
Սուրբ Զոհէն ետքը Սրբազան Քահանայապետը կը փոխադրուի Առաքելական Նուիրակութիւն ուր ճաշէն ետքը հրաժեշտ առնելով Նուիրակութեան անձնակազմէն կ՛ուղղուի «Փիթըր Փազմանի» կաթողիկէ համալսարան` հանդիպելու համար համալսարանական ու մշակոյթի աշխարհի ներկայացուցիչներուն հետ։
Հանդիպման սկիզբը նախատեսուած է Համալսարանի Ռեկտորին բարի գալուստի խօսքը ապա յանուն համալսարանի ուսուցչական անձնակազմին` դասատուի մը եւ յանուն աշակերտութեանց ուսանող ի մը վկայութիւնները, որոնց կը յաջորդէ Ֆրանչիսկոս Պապին ճառը, որ կը հանդիսանայ Նորին Սրբութեան Հունգարիոյ Ճամբորդութեան ընթացքին արտասանած հանրային վերջին ելոյթը։
Հանդիպումը կ՛աւարտի հայր մեր աղօթքով ու Քահանայապետին ներկաներուն շնորհած օրհնութեամբ, որմէ ետք Ան կ՛ուղղուի Պուտափեշտի միջազգային օդակայան, ուր տեղի ունեցած հրաժեշտի պաշտօնական արարողակարգէն ետք` ժամը 6-ի ժամանակները կը բարձրանայ օդանաւ վերադարձ կատարելու համար Հռոմ ուր կը ժամանէ գրեթէ մէկ ժամ յիսուն վայրկեան տեւող թռիչքէ մը ետք։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
