Ֆրանչիսկոս Պապը հանդիպեցաւ Մատակասկարի նախագահին ու անոր ընկերացող պատուիրակութեան հետ
Ռոպէր Աթթարեան - Վատիկան
Հինգշաբթի 17 օգոստոս 2023ի առաւօտեան, Ֆրանչիսկոս Սրբազան Քահանայապետը առաքելական պալատէն ներս ունկնդրութիւն շնորհեց Մատակասկարի հանրապետութեան նախագահ` վսեմաշուք Անտրի Նիրինա Ռայոէլինային, որ ապա հանդիպում ունեցաւ Պետութիւններու եւ միջազգային կազմակերպութիւններու հետ յարաբերութիւններու ենթաքարտուղար Գերապայծառ Միրոզլաւ Վոչովսքիին հետ։
Լուրը կը հաղորդէ Սուրբ Աթոռի մամլոյ գրասենեակը տեղեկացնելով նաեւ թէ Պետական Քարտուղարութեան մէջ տեղի ունեցած սիրալիր զրոյցներու ընթացքին գնահատանք արտայայտուեցաւ երկկողմանի դրական կապերու մասին ինչպէս նաեւ Կաթողիկէ Եկեղեցւոյ Մատակասկարի ընկերութեան տարբեր ոլորտներէն ներս ներդրումներու համար։
«Զրուցակիցները ապա շեշտը դրած են ազգային ու միջազգային բնոյթ ունեցող կարեւոր հարցերու վրայ, ինչպէս Ուքրանիոյ պատերազմը ու անոր հետեւանքները համաշխարհային գետնի վրայ, Ափրիկեան ցամաքամասը յուզող ճգնաժամային իրավիճակը եւ Վատիկանի ու Մատակասկարի միջեւ երկկողմանի համաձայնագրութեան մը ուսումնասիրութիւնը, որպէս յարգալից համագործակցութեան լրացուցիչ նշան», կը կարդանք միշտ Սուրբ Աթոռի մամլոյ գրասենեակին հրատարակած հաղորդագրութեան մէջ։
Քահանայապետին ու Նախագահին միջեւ հանդիպումը տեւած է քսան վայրկեան որմէ ետքը նորին Սրբութիւնը ընդունած ու ողջունեց է Նախագահին ընկերացող պատուիրակութեան անդամները անոնց հետ միասին նկար մը առնելով Մատակասկար կատարած առաքելական այցելութեան առիթով իրեն նուիրուած նաւու մանրանկարչութեան առջեւ ապա անոնց հետ միասին արտասանած է «Ողջոյն Քեզ Մարիամ» աղօթքը Մատակասկարի Եպիսկոպոսներուն իրեն նուիրուած Սուրբ Կոյս Մարիամի սրբապատկերին առջեւ։
Հանդիպումի աւարտին տեղի ունեցած է նուէրներու փոխանակումը։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
