Վալենսիա քաղաքին մէջ հրդեհ. Ֆրանչիսկոս Պապ մօտիկ է զոհերու ընտանիքներուն եւ վիրաւորներուն։
Վազգէն Աբարդեան - Վատիկան
Ֆրանչիսկոս Սրբազան Քահանայապետը ցաւակցական գիրի մը մէջ իր ցաւն ու մօտիկութիւնը յայտնեց, հինգշաբթի, 22 Փետրուարին Վալենսիա քաղաքին Քամփանարա շրջանի մէջ գտնուող 14 հարկանի շէնքի մէջ բռնկուած հրդեհի պատճառով արձանագրուած զոհերուն ընտանիքներուն եւ վիրաւորներուն։
Վալենսիա թեմի արքեպիսկոպոս, գերապայծառ Էնրիք Պենավ Վիտալի հասցէագրուած, Վատիկանի Պետական քարտուղարի ստորագրութիւնը կրող ցաւակցական գիրին մէջ կը կարդանք, որ Սրբազան Հայրը մօտէն կը հետեւի մարդկային կորուստներու եւ հսկայ աղէտներու պատճառ դարձած հրդեհի լուրերուն ու Աստուածային ողորմութեան կը յանձնէ զոհերու հոգիները , ապահվուելով իր հոգեւոր մօտիկութիւնը Վալենիայի ժողովուրդի եւ աղէտէն տուժած բոլոր ընտանիքներուն, որոնց համար «Աստուծոյ կ՝աղօթէ , որպէսզի անոնց ուժ ներշնչէ այս դժուար պահերուն» գրեց Վատիկանի Պետական քարտուղարը։
Ցաւակցական գիրին մէջ կարդինալ Փարոլին նշեց, որ Նորին Սրբութիւնը կ՝աղօթէ նաեւ բոլոր անոնց որոնք յանձնառու են հետազօտական աշխատանքներուն ու Վալենսիա քաղաքի պաշտպան Սուրբ Տիրամօր բարեխօսութիւն կը հայցէ բոլորին համար եւ որպէս Յարուցեալ Քրիստոսի մէջ յոյսի նշան կը փոխանցէ իր մխիթարանքի առաքելական օրհնութիւնը։
Յայտնենք, թէ մինչ կը շարունակուի հասկնալ հրդեհի պատճառները, Հրշէջի անօդաչու թռչող սարքերու տուեալներուն համաձայն ցարդ արձանագրուած են 4 զոհ ու կը նախատեսուի, որ նուազագոյնը 15 անհետ կորածներ եւ բազմաթիւ վիրաւորներ գտնուին։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
