Աղօթենք խաղաղութեան համար, Տիրոջմէ հայցենք խաղաղութեան պարգեւը

Ռոպէր Աթթարեան - Վատիկան

Չորեքշաբթի 6 Մարտի հրապարակային ընդհանուր ունկնդրութեան աւարտին Ֆրանչիսկոս Պապը իտալացի ուխտաւորներուն ուղղած ողջոյնի խօսքէն ետքը յատուկ ողջոյնի խօսք ուղղեց երիտասարդներուն, հիւանդներուն, տարեցներուն ու նորապսակներուն խրախուսելով զանոնք այս քառասնորդաց շրջանի օրերուն, շարունակելու իրենց յանձնառումը, ազատուելու ամէն այն բաներէն, որոնք իրենց կեանքը կը դիմակաւորեն, որպէսզի բոլոր սրտով վերադառնան Աստուծոյ, «որ մեզ կը սիրէ յաւէրժական սիրով» ըսաւ Ֆրանչիսկոս Պապը։

Ան ապա անգամ մը եւս նորոգեց իր հրաւէրը աղօթելու պատերազմի սարսափէն տառապող ժողովուրդներուն համար` Ուքրանիոյ, Սուրբ Երկրի եւ աշխարհի այլ վայրերուն մէջ։

«Աղօթենք խաղաղութեան համար, Տիրոջմէ հայցենք խաղաղութեան պարգեւը։ Բոլորիդ իմ օրհնութիւններս», ըսաւ Սրբազան Պապը ու հրապարակային ընդհանուր ունկնդրութիւնը աւարտեց «Հայր մեր» աղօթքով ու իր առաքելական օրհնութիւնը շնորհելով բոլոր ներկաներուն։