Նորին Սրբութիւնը ժամանեց Փափուա Նովա Կինէայի մայրաքաղաք Փորթ Մորսպի
Ռոպէր Աթթարեան - Վատիկան
Ուրբաթ` 6 սեպտեմբեր 2024ին Ֆրանչիսկոս Պապը իր քահանայապետութեան առաքելական միջազգային 45 ճամբորդութեան ծիրէն ներս, աւարտելէ ետք Ինտոնեզիայի այցը ուղղուեցաւ ճամբորդութեան երկրորդ հանգրուան Փափուա Նոր Կինէայի մայրաքաղաք` Փորթ Մորսպի, ուր ժամանեց գրեթէ վեց ժամ տեւող թռիչքէ մը ետք` տեղական ժամով 19,06ին, Հռոմի ժամով 11,06։
Փորթ Մրսպիի օդակայանին մէջ Քահանայապետը հիւրընկալուեցաւ Երկրի փոխ Վարչապետի կողմէ, ապա տեղի ունեցաւ «փրոթոքոլային» բարի գալուստի արարողութիւնը եւ պատուիրակութիւններու ներկայացումը, որուն աւարտին Սրբազան Պապը փոխադրուեցաւ Փորթ Մորսպիի Առաքելական Նուիրակութիւն, որ այս օրերուն պիտի հանդիսանայ իր նստավայրը։
Փափուա Նովա Կինէայի ճամբորդութեան յայտագիրը
Յայտնենք, որ Սրբազան Պապին Փափուա Նովա Կինէայի մէջ պաշտօնական հանդիպումները սկիզբ պիտի առնեն շաբաթ 7 սեպտեմբերի առաւօտեան, Անոր Երկրի Կառավարիչին տուած պաշտօնական այցելութեամբ, ուր Սրբազան Պապը առանձնական հանդիպում ունենալէ ետք Տիար Պոպ Պոֆէնկ Տատէի հետ, կը փոխադրուի APEC haus կեդրոն, ուր կը հանդիպի Երկրին քաղաքական ու քաղաքացիական իշխանութիւններուն եւ դիւանագիտական մարմնի անդամներուն հետ, անոնց ուղղելով ճառ մը։ Հանդիպումի աւարտին Ան առանձնապէս կ՛ողջունէ նաեւ Խաղաղական Ովկիանոսի տարածաշրջանի երկիրներու մի քանի Ղեկավարները։
Կէսօրէն ետքը Սրբազան Պապը պիտի այցելէ Caritas Technical Secondary School-ը հանդիպելով մանուկներու հետ հուսկ աւելի ուշ` Քրիստոնէից Օգնական Տիրամայր սրբավայրին մէջ հանդիպում պիտի ունենայ Փափուա Նովա Կինէայի եւ Սալոմոնէ կղզիներու եպիսկոպոսներուն, քահանաներուն, սարկաւագներուն, կրօնաւոր կրօնաւորուհիներուն, նորընծաներուն ու կրօնուսոյցներուն հետ, անոնց ուղղելով իր պատգամը։
Կիրակի 8 սեպտեմբերին սուրբ պատարագ եւ Վանիմօ քաղաքի այցը
Սրբազան Պապին Փափուա Նովա Կինէայի առաքելական ճամբորդութեան յայտագիրը կը շարունակուի երկրորդ օրը` Կիրակի 8 սեպտեմբերին երբ Նորին Սրբութիւնը այցելութիւնը պիտի ընդունի Երկրի Վարչապետին այցելութիւնը, Պապական Նուիրակութեան մէջ ապա պիտի փոխադրուի Սիր Ժոն Կիզ Սթատիում ուր պիտի մատուցէ Կիրակի օրուայ սուրբ պատարագը ու նոյն վայրէն պիտի արտասանէ նաեւ Հրեշտակ Տեառն Մարեմեան աղօթքը։
Սուրբ Զոհէն ետքը Նորին Սրբութիւնը պիտի այցելէ Վանիմօ քաղաքը, ուր պիտի ժամանէ գրեթէ երկու ժամ տեւող թռիչքէ մը ետք, այնտեղ հանդիպելու համար Վանիմոյի Թեմի հաւատացեալներուն հետ, ապա Միսիոնարներու մէկ խումբի մը հետ։ Աւարտին Նորին Սրբութիւնը վերադարձ պիտի կատարէ Փորթ Մորսպի, ուր երկուշաբթի առաւօտեան պիտի մասնակցի Փափուա Նովա Կինէայի առաքելական ճամբորդութեան վերջին պաշտօնական հանդիպումին` Երիտասարդներուն հետ եւ այս մէկը տեղական ժամով առաւօտեան ժամը 9,45ին (Հռոմի ժամով 01,45)։
Հանդիպում երիտասրադներուն հետ եւ մեկնում
Այս պիտի ըլլայ Ֆրանչիսկոս Պապին Փափուա Նովա Կինէայի մէջ ունեցած վերջին պաշտօնական հանդիպումը, որմէ ետքը Ան պիտի ուղղուի քաղաքի օդակայան ու այնտեղ կայացած հրաժեշտի արարողութեան աւարտին պիտի բարձրանայ օդանաւ ուղղուելով այս 45րդ միջազգային առաքելական ճամբորդութեան երրորդ փուլ հանդիսացող` Թիմոր Լեսթի մայրաքաղաք Տիլի ուր ժամանումը նախատեսուած է երեք ու կէս ժամ տեւող թռիչքէ մը ետք։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
