Սկիզբ առաւ Ֆրանչիսկոս Պապին 46րդ միջազգային առաքելական ճամբորդութիւնը. Քահանայապետը ժամանեց Լիւքսեմպուրկ
Ռոպէր Աթթարեան - Վատիկան
Այսօր Հինգշաբթի 26 Սեպտեմբեր 2024ի առաւօտեան սկիզբ առաւ Ֆրանչիսկոս Սրբազան Քահանայապետին Քահանայապետութեան 46րդ միջազգային առաքելական ճամբորդութիւնը, որ զինք առաջնորդեց նախ Լիւքսեմպուրկ, մէկ օրուայ տեւողութեամբ, ապա Պելճիքա` «Pour Servir Ծառայելու համար» եւ «En route avec Esperance – Ճանապարհի վրայ յոյսով» կարգախօսներով։
Ֆրանչիսկոս Պապը երկրորդ Քահանայապետն է, որ կ՛ այցելէ վերոնշեալ այս երկիրները, Սուրբ Յովհաննէս Պօղոս Բ Քահանայապետն ետքը, որ զանոնք այցելած էր 1985 թուականին, հանգրուան կատարելով նաեւ Հոլանտա, ապա Պելճիքան այցելած էր նաեւ 1995ին։
Նորին Սրբութիւնը Վատիկանէն մեկնեցաւ առաւօտեան կանուխ ուղղուելով Հռոմի Ֆիումիչինօ օդակայան, ուր հրաժեշտի փրոթոքոլային արարողակարգէն ետքը բարձրացաւ` Իտալական օդանաւային ԻԹԱ ընկերութեան պատկանող օդանաւ եւ իր հետ ճամբորդող պատուիրակութեան անդամներուն հետ միասին ուղղուեցաւ դէպի ճամբորդութեան առաջին հանգրուան հանդիսացող Լիւքսեմպուրկ։
Դէպի Լիւքսեմպուրկ
Նորին Սրբութիւնը փոխադրող օդանաւը թռիչք առաւ 8,29ին։ Քահանայապետին Լիւքսեմպուրկ ժամանումը նախատեսուած է գրեթէ երկու ժամ տեւող թռիչքէ մը ետք, որուն ընթացքին օդանաւը պիտի սաւառնի Իտալիոյ, Աւստրիոյ, Գերմանիոյ եւ Պելճիքայի օդային տարածքներուն վրայէն, որոնց Ղեկավարներուն Քահանայապետը կ՛ուղղէ քաղաքավարական հեռագիրներ։
Իտալիոյ Նախագահին ուղղած Հեռագիրն մէջ Նորին Սրբութիւնը յայտնեց, թէ ինք այս ճամբորդութիւնը կը կատարէ «մղուած այն իղձով հանդիպելու իր հաւատքի մէջ եղբայրներուն ու այդ երկիրներու բնակիչներուն տանելու խաղաղութեան եւ յոյսի պատգամ մը»։
Թռիչքի ընթացքին Սրբազան Քահանայապետը սովորութեան համաձայն ողջունեց իր հետ ճամբորդող լրագրողները շնորհակալութիւն յայտնելով անոնց իրենց մատուցած ծառայութեան համար։
Ժամանում Լիւքսեմպուրկ
Ֆրանչիսկոս Պապն ու անոր հետ ճամբորդող պատուիրակութիւնը փոխադրող օդանաւը Լիւքսեմպուրկի օդակայան վայրէջք կատարեց ժամը 9,58 ժամանակները ուր Քահանայապետը դիմաւորուեցաւ Մեծ Դուքսի, Դքսուհին ու Վարչապետին կողմէ ապա տեղի ունեցաւ փրոթոքոլային ընդունելութիւն, որմէ ետքը Սրբազան Պապը փոխադրուեցաւ Դքսութեան Պալատ, ուր նախատեսուած է անոր պաշտօնական հանդիպումը Լիւքսեմպուրկի Էնրիքօ Մեծ Դուքսին հետ։ Մինչ քովնտի սրահին մէջ Երկրին Վարչապետ` Տիար Լուք Ֆրիէտըն հանդիպում կ՛ունենայ պատուիրակութեան անդամներուն հետ։
Թարմացումը` 10,28ին
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
