Ֆրանչիսկոս Պապ. Աղօթենք վարդարանը պատերազմի խելագարութենէն տառապողներուն համար
Վազգէն Աբարդեան - Վատիկան
Չորեքշաբթի, 9 հոկտեմբերին, Հրապարակային ընդհանուր ունկնդրութեան աւարտին, ինչպէս միշտ Ֆրանչիսկոս Պապ տարբեր լեզուներով ողջունեց հրապարակը գտնուող աշխարհի տարբեր վայրերէն ժամանած ուխտաւորները ապա յիշելով երիտասարդները, տարեցները եւ նորապսակները հրաւիրեց աղօթելու Վարդարանի աղօթքը՝ վստահութեամբ յանձնուելով Տիրամօր ձեռքերուն։
«Թող Վարդարանին նուիրուած հոկտեմբեր ամիսը թանկարժէք հնարաւորութիւն ընձեռէ այս Մարեմեան աւանդական աղօթքը արժէքաւորելու համար» ըսաւ Սրբազան Հայրը ապա հրաւիրեց հոգատար Մօր վստահելու պատերազմի խելագարութենէն տուժած ժողովուրդներու տառապանքն ու խաղաղութեան իղձը, մասնաւորապէս մարտիրսոացած Ուքրանիոյ, Պաղեստինի, իսրայէլի, Միանմարի եւ Սուտանի ժողովուրդները։
Ֆրանսացի ուխտաւորներուն յղած ողջոյնի խօսքին մէջ Ֆրանչիսկոս Պապ հրաւիրեց, որպէս Սինոդական եկեղեցի դէպի Քրիստոսի ուղեւորութեան մէջ, հայցել Սուրբ Հոգիէն խաղաղութեան եւ միութեան գործիքները դառնալու շնորհքը։
Նորին Սրբութիւնը հուսկ աղօթքի կոչ ուղղեց նաեւ Գերմանացի հաւատացեալներուն յորդորելով զանոնք, թոյլ տալու որպէզի առաջնորդուին Վարդարանի միջոցաւ, Մարիամէն դէպի Անոր Որդին Յիսուսը ու աղօթելու աշխարհի խաղաղութեան եւ եկեղեցւոյ միութեան համար։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
